Sɔ' wʋsa na kpi
9
1 Ka m tiɛn gɔs nɛ' wʋsa yɛla ka kʋ'ʋg giŋa ye ninsʋŋ nɛ ya'am sɔb nɛ ba tʋʋma wʋsa bɛ nɛ Wina'am nu'usin. Alazugɔ sɔ' zi' ye nɔŋilim bɛɛ kisidim gur oo.2 Bama wʋsa na naae zin'ig yinne:
pʋpiel nɛ bugis, ninsʋŋ nɛ nimbɛ'og,
banɛ an nyain nɛ banɛ ka' nyainnɛ,
banɛ maan maana nɛ banɛ pʋ maana.
Lin an si'em tis ninsʋŋ la, ala mɛn ka li na aaɛn tis nimbɛ'og.
Lin an si'em tis banɛ kaanbi zi'el la
mɛ anɛ ala tis banɛ zɔt kaanbʋg la.
3 Nɛ'ɛŋa an bʋmbɛ'ɛd linɛ tʋm dunia nwa ni: Saal wʋsa gan'al si'em la linɛ diti ba. Ba sʋnya pɛ'ɛl nɛ bɛ'ɛd ka ba tʋm gɛn tʋʋma ba vʋm saŋa wʋsa, ka li nya'aŋ ka ba kpi.
4 Amaa onɛ wʋsa vʋe lɛm mɔr ti'ir;
hali bavʋt sɔn'oe gbigim kpiiluŋ.
5 Bɔzugɔ banɛ vʋe la mi' ye ba na kpi,
amaa banɛ kpi zi' si'ela.
Ba pʋ lɛm mɔr yɔɔdɛ,
li kʋ yuugɛ ka nidib tami ba yɛla.
6 Ka ba nɔŋilim nɛ ba kisidim nɛ ba ya'amlɛog gaad,
ka ba pʋ lɛm mɔr zin'isi'a dunia nwa nii.
7 Kem dii fʋ diib nɛ sumalisim ka nu ka kɛ ka fʋ sʋnf ma'ae. Ka Wina'am nini pʋn tig fʋn tʋm si'el la. 8 Yɛɛm fupielig saŋa wʋsa, ka mɛ bu'oe malʋŋ kpaam niŋi fʋ zug saŋa wʋsa. 9 Dim malisim nɛ fʋ pu'a kanɛ ka fʋ nɔŋ la fʋ vʋm saŋa linɛ ka' gbinnɛ ka Wina'am tisif dunia nwa ni la. Dim dabisbanɛ ka' gbin la wʋsa nɛ o, bɔzugɔ linɛ an namiskanɛ ka fʋ nyɛ dunia nwa ni. 10 Fʋ nu'ugʋ gban'e tʋʋm si'a wʋsa, fʋn tʋmmi li nɛ fʋ paŋ wʋsa, bɔzugɔ tʋʋma bɛɛ gban'ar bɛɛ mi'ilim bɛɛ ya'am kae yaʋgʋn, zin'ikan ka fʋ wa'ae la. 11 M lɛn nyɛ si'el ya'as dunia nwa ni:
Li ka'anɛ onɛ mi' zɔɔgʋ dit ya'an zɔɔginɛ,
bɛɛ onɛ mɔr paŋi nyaŋid zaba nii.
Li ka'anɛ ya'am sɔbi paamid diib bɛdegʋʋ,
bɛɛ onɛ mɔr baŋiri paamid arezaka.
Li ka'anɛ onɛ zamis hali paamid on bɔɔd si'ela:
ayei, li anɛ sia'alsʋŋ bɛɛ sia'albɛ'ɛdi tisidi ba wʋsa.
12 Sɔ' mɛ zi' saŋa kanɛ ka o na kpii.
Asau gban'ad zimi si'em,
bɛɛ bɛndisi gban'ad niis si'em la,
ala ka ba bɛnd nidib
ka li gban'adi ba tɔ'ɔtɔ ka ba zi' li yɛla baa bi'elaa.
Ya'am nɛ yalimis yɛla
13 Ka m lɛn nyɛ dunia nwa ni ya'am si'a buudi ka li an sʋm tisim. 14 Tembil si'a da bɛ ka li nidib pʋ zu'oe, ka na'atita'ar kena ye o gilig ka zab nɛ li nɛ o paŋ la wʋsa. 15 Ka dau bɛ tembil nwa nii an nɔŋdaan ka lɛɛ mɔr ya'am, o da nɔk o ya'am faaɛn teŋ nwa. Amaa sɔ' da pʋ lɛn tiɛn dau kaŋa yɛlaa. 16 Alazug ka m yɛl ye la'am nɛ ya'am an sʋm gat paŋ la, ba ziem nɔŋdaan ya'am la ka pʋ kɛlis o yɛlaa.
17 Ya'am sɔb ya'a pian' bʋgʋsiga ka fʋ di'e,
li sɔn'oe na'abi na pian'adi tansidi tisid zɔn.
18 Ya'am an sʋm gat zaba la'ad,
amaa tʋʋmbɛ'ɛd sɔb yinne san'amid bʋnsʋma bɛdegʋ.