8
1 Anɔ'ɔn nwɛnɛ ya'am sɔba?Anɔ'ɔn baŋid yɛla gbinnɛ?
Ya'am nied nɛ ninsaal nini
ka tiakid o ka o kʋ lɛn lɔɔd nindaa.
Siakim na'ab nɔɔr
2 Siakim na'ab wʋʋ fʋn kaanbi zi'el Wina'am tuon si'em la. 3 Da gɛn' ka duoe na'ab tuonnɛ. Mɛ da nwa'asid nɛ na'aba bɔzugɔ, o na tun'e tʋm on bɔɔd si'el. 4 Na'ab pian'ʋk mɔri paŋ, ka sɔ' kʋ tun'e bu'os o ye, “Bɔ ka fʋ maan nɛ'ɛŋa?”
5 On mɛkama siak o, kʋ nyɛ dɛŋŋa.
Ya'am sɔb mi' o pʋtɛn'ɛrin saŋa kanɛ nar ka dɔl suor.
6 Si'el wʋsa mɔri li saŋa nɛ li suor,
la'am nɛ ninsaal bɛllim an tɔɔg si'em la.
7 Sɔ' sadigim zi' linɛ ken bɛog na la,
anɔ'ɔnɛ na tun'e yɛl linɛ saa na kena?
8 Sɔ' ka' sisi'em paŋ ka na tun'e gu'oe li,
ala mɛn ka sɔ' ka' paŋ o kum daarɛ.
Nwɛnɛ zabzabidi ka' suori na zɔ ka bas zaba si'em la,
ala mɛn ka tʋʋmbɛ'ɛd kʋ bas banɛ tʋmmi li la suorɛ.
9 Nɛ' wʋsa ka m nyɛ saŋkan ka m nɔki m ya'am ye m baŋ dunia nwa gbin la. Saŋa bɛ nɛ ka nid sʋ'oe o taaba tʋmmi ba pitɔɔg, ka li mɛ an mugusʋgʋ tis o mɛŋ. 10 M lɛn nyɛ ka ba mum bugisnam nɛ girima. Ka banɛ mi' ba bugusim yɛla wɔ'ɔgidi ba ban daa bɛ teŋ si'a la. Nɛ' mɛn ka' gbinnɛ. 11 Tʋʋmbɛ'ɛd sɔb ya'a pʋ nyɛt tʋbtɛkir tɔ'ɔtɔ, li kɛtnɛ ka tʋʋmbɛ'ɛd yaligid. 12 La'am nɛ bugisnamɛ tʋm bugisim bɛdegʋ ka mɔr nyɔvʋr wɔk la, li na an sʋm gat ala tis Wina'am nimbanɛ zɔt o. 13 La'am nɛ bugisnam la pʋ zɔt Wina'am la, li kʋ an sʋm tisi ba, ka ba dabisa kʋ wa'am nwɛnɛ winnigi ɛɛnti bik ka fʋ siig wa'am laa. 14 Si'el lɛm bɛ dunia nwa ni ya'as ka ka' gbinnɛ. Ninsʋma di'esid bugisnam yɔɔd. Ka bugisnam mɛ di'esid ninsʋma yɔɔd. Nɛ' mɛn ka m yɛl ye li ka' gbinnɛ. 15 Alazug dim sumalisim ya vʋm saŋa bɔzugɔ si'el kae an sʋm tis nidi gat on na di ka nu ka mɔr sumalisim. Ka sumalisim na bɛ nɛ o, o tʋʋma zin'igin, dabisban ka Wina'am tis o dunia nwa pʋʋgin la. 16 Man daa mɔɔd ye m baŋ linɛ maan dunia nwa wʋsa ni ka nyɛ ka ninsaal namisid hali nintaŋ nɛ yʋ'ʋŋ wʋsa ka pʋ gbisida. 17 Ani ka m nyɛ linɛ wʋsa ka Wina'am maal. Sɔ' kae na nyaŋi gban'e linɛ tʋm dunia nwa ni la gbinnɛ. La'am nɛ paŋ kanɛ ka o mɔɔd la wʋsa o kʋ gban'e li gbinnɛ. Baa ya'am sɔb ya'a ma' ye o mi', o kʋ nyaŋi gban'e li gbinnɛ.