7
1 Yʋ'ʋsʋŋ an sʋm gaad tudaar,ka fʋ kum daar sɔn'oe fʋ du'am daar.
2 Li an sʋm ka fʋ keŋ kʋyin
gat yikanɛ ka ba maan sumalisim.
Bɔzugɔ kum an sɔ' mɛkama ba'asʋg zin'ig.
Banɛ vʋe wʋsa tɛn'ɛsim nɛ'.
3 Sʋnsa'aŋ an sʋm gat la'ad
bɔzugɔ sʋnsa'aŋ an sʋm tisi fʋ sʋnr.
4 Ya'am sɔb sʋnf bɛ nɛ kʋyin.
Amaa zɔn sʋnya bɛ nɛ sumalisim zin'ig.
5 Fʋ ya'a di'e ya'am sɔb tansʋg
li sɔn'oe fʋn na kɛlisid zɔn yʋʋma.
6 Nwɛnɛ gɔn'ɔsi dit bugum tansid si'em la,
ala mɛnɛ an zɔlʋg la'ad. Nɛ' mɛ ka' gbinnɛ.
7 Filiŋʋ kɛt ka ya'am sɔb liebid zɔlʋg
ka zam san'amid nid sʋnf.
8 Si'el mɛkama wʋsa naar an sʋm gati li pin'ilʋg.
Ka mɔdigir mɛ an sʋm gat nyɛɛsim.
9 Da kɛt ka fʋ sʋnf duod tɔ'ɔtɔ
ka sʋnduor anɛ zɔn din.
10 Mid ka fʋ yɛl ye, “Bɔɔ lɛɛ kɛ ka kʋdimin la da an sʋm gat nannanna?”
Bɔzugɔ, bu'os kan ka' ya'am bu'osʋgɔ.
11 Ya'am nwɛnɛ faar nɛ,
li anɛ bʋnsʋŋ ka mɔr nyɔɔdi tis banɛ bɛ dunia nwa ni la.
12 Ya'am anɛ linɛ lusidif
wʋʋ ligidi lusid si'em la,
Amaa mi'ilim an sʋm si'em nwa:
li faandi onɛ mɔr ya'am la nyɔvʋr.
13 Tɛn'ɛsim gɔs Wina'am maal si'el.
Anɔ'ɔnɛ na nyaŋi tiɛn on pɔnd si'ela?
14 Saŋa ya'a ti an sʋm, fʋn mɔr sumalisim.
Saŋa ya'a mɛ ti an bɛ'ɛd fʋn baŋim ye li anɛ Wina'am maali li wʋsa.
Alazugɔ ninsaal kʋ nyaŋi baŋ o bɛogɔ.
15 Mam bɛllim dinɛ ka' gbin nwa ni, m nyɛ nɛ'ɛnam wʋsa:
ninsʋŋ kpiidi tɔ'ɔtɔ o pʋpielimin
ka bugis mɛ vʋe yuug nɛ o bugusim.
16 Da an sʋm galisɛ, bɛɛ mɔr ya'am galisɛ:
bɔ ka fʋ san'amidi fʋ mɛŋa?
17 Da mɔr pʋtɔɔgʋ galisɛ, mɛ da an zɔlʋgɔ:
bɔ ka fʋ kpiid ka fʋ daar pʋ paae?
18 Li an sʋm ka fʋ gban'e yinne ka mɛ da bas ka yinne la gaadɛ.
Ninkanɛ zɔt Wina'am mɔr ayi' la wʋsa ka kʋ maali baa tʋʋgɛ.
19 Ya'am kɛt nɛ ka li sɔb mɔr paŋi
gaad na'anam piiga.
20 Ninsʋŋ kae dunia nwa nii tʋm sʋm
ka bɛ'ɛd ka' o nii.
21 Da kɛlisid dinɛ wʋsa ka nidib yɛta,
ka daasi'erɛɛ fʋ na ti wʋm ka fʋ yammʋg tʋ'ʋdif.
22 Ka fʋ mi' ye saŋa bɛdegʋ fʋn mɛ tʋ'ʋd sieba. 23 Man nɔki m ya'am kpans nɛ' wʋsa ka mɔɔd ye m lieb ya'am sɔb, amaa nɛ' gaad man nɛ. 24 Ya'am ya'a an si'em wʋsa, li zulim nɛ hali ka ninsaal kae na iee nyɛɛ li. 25 Ka m lɛm mɔ ye m tiaki m pʋtɛn'ɛri vɛɛnsi baŋ ya'am ka gban'e si'elnam gbin. M mɔ ye m pa'al ye pitɔɔlim anɛ zɔlimis ka gɛɛmis mɛ an yalimis.
26 M nyɛ tɔɔg kanɛ gaad kum.
Linɛ an pu'a kanɛ an bɛndig,
ka o sʋnf nɛ o nu'us nwɛnɛ baŋ ka ba bɛnd.
Ninkanɛ ma'ad Wina'am sʋnf la ma'aa na pɔns o,
m daa nyɛnɛ dau sʋŋ yinne tusir pʋʋgin,
Wina'am maal ninsaal nɛ sʋ'ʋŋa,
amaa sɔ' mɛkama ieed o mɛŋ pitɔya'am.”