6
1 Ka m lɛn nyɛ yɛlbɛ'ɛsi'a linɛ tɛbis ka paad nidib dunia nwa ni. 2 Li anɛ ye Wina'am tis nid arezak nɛ mɔrim nɛ na'asi ka kɛ ka o pʋ kɔ'ɔŋid o ya'am bɔɔdim. Amaa Wina'am pʋ kɛ ka o dii li malisim, ka saan lɛɛ kena di li malisim. Nɛ' ka' gbinnɛ, ka an sʋnsa'aŋ pamm. 3 Nid na tun'e mɔr biis kɔbiga ka o yʋma zu'oe. Ka la'am nɛ on yuug si'em la, o ya'a kʋ dii o areza'as la malisim o vʋm saŋa ka kpi ka pʋ nyɛ kʋʋrɛ, bikpi'iŋ sɔn'oe o. 4 Bɔzugɔ ban du'a sɔ' la kennɛ yɔɔgʋ na ka lɛn lɛb yɔɔgʋ wʋʋ onɛ ken likin ka ba tam o yɛla la, 5 la'am nɛ on pʋ nyɛ nɛɛsim bɛɛ baŋ vʋm an si'el la. O mɔr yɔlisim sɔn'oe ninkaŋa sɔb 6 baa o ya'a vʋe yʋʋm tusir bɛɛ tusa ayi' ka pʋ dii o mɔrim malisim. Ba wʋsa pʋ wa'anɛ zin'ig yinnee?7 Ninsaal mɔɔr wʋsa anɛ m di la yɛla.
Amaa nɛ wala wʋsa o diib pʋ siakid oo.
8 Bɔ ni ka ya'am sɔb sɔn'oe zɔlʋgɔ?
Nyɔbɔ ka nɔŋdaan na nyɛ o ya'a mi' o mɛŋ mɔrim nidibinɛ?
9 Kɛl ka fʋ nif tig nɛ fʋn mɔr si'eli,
gaad linɛ ka fʋ nan tɛn'ɛsidi li yɛla.
Nɛ' mɛ anɛ zaalim wʋʋ fʋn na kat pɛbisʋg ye fʋ gban'e nɛ.
10 Bʋn kanɛ bɛ la, ba pʋn pʋdi li yʋ'ʋr sa.
Ka ninsaali an si'em la, ba pʋn baŋ.
Nid kae na tun'e nwa'as nɔŋgbannwa'ari
nyaŋ onɛ paŋi gaad o.
11 Pian'ad ya'a zu'oe, li gbin anɛ fiin
ka li nyɔɔd an bɔ tis sɔ'?
12 Ka anɔ'ɔnɛ mi' linɛ an sʋm tis nid o vʋm saŋa. O dabisa banɛ an fiin ka ka' gbin la na gaad. Ka anɔ'ɔnɛ na yɛl o linɛ na tʋm dunia nwa ni o kum nya'aŋa?