Gu'usim fʋn dɔl Wina'am si'em
5
1 Fʋ ya'a keŋ Wina'am Pʋ'ʋsim Yin fʋn gu'usimi fʋ mɛŋ. Kem ka kɛlis sʋ'ʋŋa, gaad fʋn na maan maana wʋʋ zɔn banɛ zi' ye ba tʋm bɛ'ɛd la maan si'em la.2 Da kɛ ka fʋ nɔɔr pian'ad tɔ'ɔtɔ pa'an linɛ bɛɛ fʋ sʋnfʋn
ka gbirigi kaanbi zi'el Wina'am tuonnɛ.
Wina'am bɛ nɛ agɔl ka fʋn mɛ bɛ teŋin.
Alazug kɛl ka fʋ pian'ad an fiin.
3 Nwɛnɛ yɛl babigi na bɛ sɔ' sʋnfʋn ka li kɛ ka o zaansim si'em la,
ala ka li na an nɛ zɔlʋgʋ na pian'ad pian'ayɛɛd.
4 Fʋ ya'a kaanbi zi'el Wina'am tuon fʋn da yuug nɛ yɔɔbɔ. Baŋim ye o ba'a kae nɛ zɔnnɛ; mɔɔm ka yɔ fʋn kaanb si'el la. 5 Fʋ ya'a pʋ kaanbɛ li sɔn'oe fʋn na kaanb ka pʋ yɔɔ. 6 Da kɛ ka fʋ nɔɔr kɛ ka fʋ tʋm tʋʋmbɛ'ɛdɛ. Mɛ da yɛl Wina'am Pʋ'ʋsim Yir tʋmtʋm la ye fʋn daa kaanb la fʋ daa yidig nɛ. Bɔ ka fʋ na kɛ ka Wina'am sʋnf duoe nɛf ka o san'ami fʋ nu'ug tʋʋma? 7 Zaansima bɛdegʋ nɛ pian'abɛdʋg anɛ zaalim. Gu'usim fʋn dɔl Wina'am si'em.
Zam arezak ka' nyɔɔdɛ
8 Fʋ ya'a nyɛ ka ba namisid nɔŋdaan teŋ si'a ni ka mɔŋ o bʋʋd, fʋn da kɛ ka li lidigi fɔ. Bɔzugɔ kpɛɛm wʋsa mɔr onɛ sʋ'oe o, ka on mɛ mɔr sʋ'ʋd. 9 Zʋʋd linɛ yit teŋin la na ka ba dit. Na'ab gba nyɔɔd yit nɛ pɔɔgin na.
10 Onɛ nɔŋ ligidi pʋ nyɛt ligidi ka li siakida.
Onɛ bɔɔd areza'as o nini pʋ tigid on mɔr si'ela.
Nɛ' mɛ ka' gbinnɛ.
11 Diibi paasid si'em la,
ditib mɛ paasid nɛ ala.
Ka nyɔbɔɔ bɛ tis o sɔba
gat o nini na gɔsidi li?
12 Tʋmtʋm ya'a di fiin bɛɛ bɛdegʋ, o gbisidnɛ o ya'amin.
Amaa arezak daan pʋ gbisid baa bi'elaa o mɔrim la yɛla.
13 M lɛn nyɛ tʋʋm kanɛ an tʋʋmbɛ'ɛd hali dunia nwa ni.
Arezak sɔb la'asid kpan'am su'ad ka li lieb yɛla tis o hali,
14 ka o zutɔɔg kɛ ka li widig ka bas o.
Ka o ya'a mɔr biig, faar kae ka o na basi tis oo.
15 Ba du'ad nid nɛ biel.
On kɛn si'em na la, ala ka o mɛ lɛbid.
O kʋ nɔk on tʋm nyɛ si'el la keŋɛ.
16 Nɛ' mɛ anɛ yɛlpakir:
Nidi kɛn si'em na la, ala ka o mɛ lɛbid.
O namsisʋg la wʋsa nwɛnɛ onɛ tʋm tʋʋmzaal nɛ,
o kʋ tun'e paam si'eli yii li nii.
17 O dii o dabisa wʋsa dunia nwa ni nɛ namisʋg nɛ sʋnsa'aŋ,
ka nyɛt yɛltɔɔd nɛ sʋnpɛɛn gʋllim.
18 Tɔ, ka m vʋʋg ye li an sʋm ka nar ye ninsaal dit ka nuud ka paam sumalisim o namisʋg tʋʋma la pʋʋgin dabisa bi'ela banɛ ka Wina'am tis o ka o vʋe la. Bɔzugɔ, lina aan o nyɔɔd. 19 Linɛ paas, Wina'am ya'a nɔk arezak nɛ mɔrim tis sɔ', ka lɛn tis o suor ye o nyɛɛ o tʋʋma la malisim ka dii li nyɔɔd wʋsa, li anɛ Wina'am piini. 20 Wina'am kɛnɛ ka on sɔb mɔr sumalisim daar wʋsa ka kʋ lɛn fabin o bɛllim yɛlaa.