Mukir nɛ namisʋg nɛ zua ka'alim
4
1 Ka m lɛn gɔs ya'as ka nyɛ mugusʋg buudi wʋsa dinɛ bɛ dunia nwa ni.M nyɛ bam mugusid sieba la ninta'am
ka sɔ' ka' bɛlisidi baa.
Paŋ bɛ nɛ banɛ mugusidi ba la nu'usin,
dinzug ka sɔ' ka' bɛlisidi baa.
2 Ka m yɛl nyain ye banɛ pʋn kpi sa la
mɔr sumalisim gat banɛ vʋe la.
3 Amaa onɛ sɔn'oe wʋsa anɛ onɛ ka ba nam pʋ du'a.
On sɔb nam pʋ nyɛ bɛ'ɛd kanɛ namisid nidib dunia ni laa.
4 Ka m lɛn nyɛ ka baŋ ye fufum nɛ ti taaba zugʋ kɛ ka saalib pamm tʋm hali. Nɛ' mɛ ka' gbinnɛ. Li anɛ wʋʋ fʋn na kat pɛbisim nɛ.
5 Zɔlʋg kaknɛ o nu'us ka kʋ siaki tʋmm
hali ka kɔ'ɔm kʋʋd o.
6 Nid ya'a mɔr bi'ela ka mɔr sumalisim
sɔn'oe onɛ tʋm paam ka namisid
ka di an wʋʋ o katnɛ pɛbisim ye o gban'e nɛ.
7 M lɛn nyɛ si'el ya'as ka li ka' gbin dunia nwa nii:
8 Dau da bɛ aan o kɔn',
ka ka' ba'abiig bɛɛ o mɛŋ biiga.
O tʋʋma da ka' bɛnnɛ.
Nɛ wala o nini daa pʋ tig o arezak la.
Ka o bu'os o mɛŋ ye, “Mam tʋmmi tisid anɔ'ɔnɛ?
Bɔ ka m mɔŋi m mɛŋ sumalisim?”
Nɛ' mɛ anɛ namis zaalig ka ka' gbinnɛ.
9 Nidib ayi' ya'a la'am bɛ sɔn'oe nid yinne
bɔzugɔ ba na tun'e tʋm paam nyɔɔd bɛdegʋ.
10 Ayinne ya'a lu, o tiraan na nyaŋi sʋŋ o ka o duoe.
Amaa nid ya'a lu ka sɔ' kae na sʋŋ o ka o duoe, o bɛ nɛ yɛla ni.
11 Nidib ayi' ya'a la'asi digi li anɛ wamm.
Amaa nid ya'a dig o kɔn'ɔkɔn', li na niŋ wala an wamm nɛ?
12 Nid yinne nyaŋir pʋ tɔya,
Amaa nidib ayi' na tun'e sʋŋ taaba yi yɛla ni.
Hali nwiig kanɛ pan'am atan' pʋ kɛnsigid na'anaa.
13 Dasaŋ onɛ an nɔŋdaan ka mɔr ya'am gat bʋnkʋdʋg onɛ an na'ab ka an zɔlʋg ka mɛ pʋ lɛn di'ed nimmua sa'alʋgɔ. 14 Li tun'e anɛ ye dasaŋ nwa yinɛ sanrega ni na di na'am la, bɛɛ ba mɛ tun'e du'a o nɛ nɔŋin. 15 Ka m nyɛ ka banɛ wʋsa vʋe ka bɛ dunia nwa ni la dɔl na'apaal la. 16 Nimbanɛ dɔl o la ka' bɛnnɛ. Amaa ka zʋmaaŋ kanɛ yuolim la kʋ mɔr sumalisim nɛ na'ab nwaa. Nɛ' mɛ ka' gbinnɛ. Li anɛ wʋʋ fʋn na kat pɛbisim ye fʋ gban'e nɛ.