Si'el wʋsa mɔri li saŋa
3
1 Si'el wʋsa mɔri li saŋa.Tʋʋma wʋsa mɔri li saŋa dunia nwa ni.
2 Du'am saŋa bɛ nɛ, ka kum saŋa bɛ;
sɛɛb saŋa bɛ nɛ, ka vɔɔnb saŋa bɛ;
3 kʋʋb saŋa bɛ nɛ, ka ti'ebʋg saŋa bɛ,
nwa'ar saŋa bɛ nɛ, ka mɛɛb saŋa bɛ;
4 kukuma saŋa bɛ nɛ, ka la'ab saŋa bɛ,
kʋʋr kaasig saŋa bɛ nɛ, ka sumalisim wa'a saŋa bɛ;
5 Kuga la'asʋg saŋa bɛ nɛ, ka li widigir saŋa bɛ.
Taaba pʋ'ʋsʋg saŋa bɛ nɛ, ka a-bas-taaba pʋ'ʋsʋg saŋa bɛ.
6 Ieeb saŋa bɛ nɛ, ka bɔdigir saŋa bɛ;
mɔrim saŋa bɛ nɛ, ka basib saŋa bɛ.
7 Aansig saŋa bɛ nɛ, ka sɛɛnb saŋa bɛ.
Sinnim saŋa bɛ nɛ, ka pian'ad saŋa bɛ;
8 nɔŋilim saŋa bɛ nɛ, ka kisigir saŋa bɛ;
zaba saŋa bɛ nɛ, ka sumbʋgʋsʋm saŋa bɛ.
9 Bɔ ka tʋmtʋm nyɛti yii o namisʋg pʋʋginɛ? 10 M nyɛ namiskanɛ ka Wina'am nɔki ziil ninsaalib la. 11 O maal si'el wʋsa ka li vɛnli li saŋa, ka mɛ kɛ ka saalib tɛn'ɛsid saŋa linɛ gaad nɛ linɛ kenna la yɛla wʋsa. Amaa nɛ wala wʋsa ba kʋ tun'e baŋ on maal si'el la wʋsa lin yi pin'ilʋgʋn ken paae li naarin la gbinnɛ. 12 Mam mi' ye bʋnsʋŋ si'a kae gat ninsaali na mɔr sumalisim ka mɛ tʋm sʋ'ʋm o vʋm saŋaa. 13 Linɛ paas anɛ ye sɔ' wʋsa na tun'e di ka nu ka mɔr sumalisim ka li yinɛ o tʋʋma ni na. Nɛ' anɛ Wina'am piini. 14 M mi' ye bʋn linɛ ka Wina'am maal pʋ naada. Si'el kʋ tun'e paasɛ, ka si'el mɛ kʋ yii di pʋʋginɛ. Wina'am maal ala ye nidib tis o girima bɛdegʋ. 15 Bʋn kanɛ da pʋn tʋm nɛ bʋnkanɛ na tʋm wʋsa anɛ linɛ pʋn tʋm sa. Ka Wina'am na kɛ ka bʋn linɛ gaad la wʋsa lɛm maal ya'as.
16 Ka m lɛn nyɛ bʋnsi'a ya'as linɛ maan dunia nwa ni. Bugusim bɛ ban kat saria zin'isi'a la; ɛɛn, zin'ikanɛ nar ye yɛlsida bɛ la, bugusim bɛɛ ani. 17 Ka m lɛn tɛn'ɛs m sʋnfʋn ye Wina'am na kad ninsʋma nɛ nimbɛ'ɛdnam wʋsa saria. Bɔzugɔ tʋʋm wʋsa mɔri li saŋa nɛ li maalʋg suor. 18 Ka m lɛn tɛn'ɛs ye Wina'am kɛtnɛ ka ninsaalib baŋid ye ba anɛ wʋʋ bʋnkɔnbid nɛ. 19 Dinɛ na niŋ ninsaal la, dinɛ mɛ na niŋ bʋnkɔnbid. Saalib na kpi wʋʋ bʋnkɔnbidi kpiid si'em la, ba wʋsa mɔri vʋm yinne. Ninsaal pʋ mɔri nyɔsi'a gat bʋnkɔnbʋgɔ. Nɛ' mɛn wʋsa ka' gbinnɛ. 20 Ba wʋsa kennɛ zin'ig yinne. Ba wʋsa yinɛ tannin na ka tannin ka ba na lɛb. 21 Anɔ'ɔnɛ na nyaŋi baŋ ye ninsaal siig dʋt nɛ agɔl ka bʋnkɔnbʋg siig sigid teŋinɛ? 22 Ala ka m baŋ ye bʋnsʋŋ kae tis ninsaali gat on naanɛ di malisim o tʋʋma pʋʋginɛ, bɔzugɔ linɛ aan o nyɔɔd. Anɔ'ɔnɛ na ti mɔr o lɛb na ka o nyɛ linɛ na tʋm o kum nya'aŋa?