Yamlɛog tʋʋma ka' gbinnɛ
2
1 Ka m tɛn'ɛsi m sʋnfʋn sa ye, “Tɔ, kɛl ka m tʋmim ya'amlɛog bɔɔdim ka gɔs ye bɔɔ na niŋɛ.” Amaa din wʋsa mɛ anɛ zaalim. 2 Man nyɛ ka di'emyaalis anɛ zɔlimis, ka nyɔbɔɔ yit ya'amlɛog tʋʋma ni? 3 Ka m yɛlim mɛŋ ye, m na bʋgʋli m sʋnf nɛ daam hali ka maali m mɛŋ wʋʋ zɔlʋg nɛ, amaa ka m ya'am nan kpɛn vʋe. M da bɔɔd ye m kpansi gɔs ye bɔɔ nar ye ninsaal tʋm saŋa bi'ela kanɛ ka o mɔr dunia nwa ni. 4 Ka m tʋm tʋʋm kpi'ema ka mɛ' yaa tisim mɛŋ ka kua pɔɔd bɛdegʋ, 5 ka maal lɔmbɔn'ɔdi sɛ tiwanna buudi wʋsa li pʋʋgin, 6 ka ga mu'a mɔri dɔ'ɔnsidi m tiis la. 7 M mɛ da lɛn da' yamdaad nɛ yampu'abi pɛ'ɛs, ka ba sieba la'an du'a m yin. Ka m mɛ mɔr niigi nɛ kɔnbidi gat nimbanɛ wʋsa da bɛ Jerusalem ka man nan kae. 8 M da paam anzurifa nɛ sanlima bɛdegʋ ka di'es areza'as tɛɛns bɛdegʋ na'anam san'an tisim mɛŋ; ka mɛ la'as dap nɛ pu'a banɛ yʋ'ʋmmi tisidim, nɛ pu'ab bɛdegʋ banɛ na ma'ae dau sʋnf. 9 Ka m kpi'euŋ yʋ'ʋn da gat na'abanɛ wʋsa dɛŋi m tuon Jerusalem tempʋʋgin; ka la'am nɛ lin wʋsa m ya'am da nan kpɛn vʋe.10 Linɛ wʋsa ka m nif da nyɛ ka bɔɔd la, m da paami li,
ka pʋ zan'asi m ya'am bɔɔdim.
M sʋnf da ma'ae nɛ m tʋʋma wʋsa,
ka nwa' da aan m tʋʋma la wʋsa nyɔɔd.
11 La'am nɛ wala wʋsa man da gɔsi m nu'ug tʋʋma
ka nyɛ man namisi paam si'el wʋsa la,
m nyɛ ka li wʋsa ka' gbinnɛ, wʋʋ fʋn na kat pɛbisim ye fʋ gban'e nɛ.
Si'el kae mɔr nyɔɔd dunia nwa nii.
Ya'am nɛ zɔlimis wʋsa anɛ yɔri
12 Ka m yʋ'ʋn pin'ili tɛn'ɛsid,
ya'am nɛ gɛɛmis nɛ zɔlimis yɛla.
Na'apaal na tʋm bɔ
ka li ka'anɛ linɛ pʋn tʋm sa?
13 Ka m nyɛ ka ya'am mɔr nyɔɔdi gat yalimis,
nwɛnɛ nɛɛsim mɔr nyɔɔdi gat lik si'em la.
14 Ya'am sɔb mɔr nini nyɛt, ka zɔlʋg on ken lik.
Amaa m kpansi baŋ ye bʋn yinne paadi ba wʋsa.
15 Tɔ, ka m lɛn tɛn'ɛsi m sʋʋnrin sa ye yɛl linɛ paad zɔlʋg mɛ paad mam.
Dinzugɔ, nyɔbɔ ka man nyɛ m ya'am la pʋʋginɛ?
Ka m yɛli m sʋʋnrin sa ye, “Nɛ' mɛ ka' gbinnɛ.”
16 Nwɛnɛ din kʋ yuugɛ ka ba tam zɔlʋg yɛla si'em la,
ala mɛn ka ba na tam ya'am sɔb yɛla;
Nwɛnɛ zɔlʋgʋ na kpi si'em la,
ala mɛn ka ya'am sɔb mɛ na kpi.
Tʋʋm galisʋg anɛ zaalim
17 Alazug ka m kisig dunia nwa bɛllim bɔzugɔ li anɛ namisʋg nɛ sʋnsa'aŋi tisim. Ka li wʋsa ka' gbinnɛ, wʋʋ fʋn na kat pɛbisim nɛ. 18 Ka m kisig bʋn linɛ wʋsa ka m tʋm nyɛ dunia nwa ni bɔzugɔ, m na basi li tis onɛ na dɔllim nya'aŋ na. 19 Ka anɔ'ɔnɛ na baŋ ye o sɔb na an ya'am sɔb bɛɛ zɔlʋgɔ? La'am nɛ wala o na sʋ'oe bʋn dinɛ wʋsa ka m zaŋi m ya'am tʋm namis ka nyɛ dunia nwa ni la. Nɛ' mɛ ka' gbinnɛ. 20 Ala ka m sʋnf pin'ili san'am m dunia namisʋg nwa zug. 21 Nid na nɔk o ya'am nɛ baŋir nɛ mi'ilim tʋm o tʋʋma, ka di an tilas ye o bas on paam si'el wʋsa la tis ninkanɛ pʋ namisi di yɛlaa. Nɛ' mɛ ka' gbinnɛ ka mɛ an zutɔɔg. 22 Bɔ nyɔɔd ka ninsaal nyɛti yi o dunia nwa fara nɛ namisʋg pʋʋginɛ? 23 Daar wʋsa o tʋʋma anɛ namisʋg nɛ sʋnsa'aŋ, la'am nɛ yʋ'ʋŋ wʋsa o ya'am pʋ dig ya. Nɛ' mɛ ka' gbinnɛ. 24 Nid kʋ tʋm bʋnsʋŋ si'a gaad on na di ka nu ka nyɛ sumalisim o tʋʋma nii. M mɛ nyɛ ka lina wʋsa yinɛ Wina'am san'an na 25 bɔzugɔ, ya'a ka' onɛ, anɔ'ɔnɛ na di bɛɛ nyɛ malisim? 26 Dau kanɛ ma'ae Wina'am sʋnf la ka o tisid o ya'am nɛ mi'ilim nɛ sumalisim. Amaa o kɛtnɛ ka tʋʋmbɛ'ɛd sɔb namisid ka la'as areza'asi digili tis onɛ ma'ae Wina'am sʋnf la. Ka li wʋsa ka' gbin wʋʋ fʋn na ye fʋ kad pɛbisim gban'e nɛ.