Pa'ala
Si'el wʋsa ka' gbinnɛ
1
1 Labakaŋa yinɛ Pa'ana onɛ an David biig ka da di na'am Jerusalem tempʋʋgin la na.2 Pa'an la yɛl ye,
“Li ka' gbinnɛ! Li ka' gbinnɛ
Asida si'el wʋsa ka' gbinnɛ!
3 Ninsaal na nyɛ nyɔbɔ
yit tʋʋm kanɛ ka o tʋm dunia nwa pʋʋginɛ?
4 Zʋmaana kena ka gaad,
amaa dunia la on kpɛm bɛ nɛ saŋa wʋsa.
5 Winnig tansid ka lɛm kpɛn'ɛd,
ka lɛbid on yi zin'isi'a la na tɔ'ɔtɔ.
6 Pɛbisʋg la da'adnɛ ken ya-tuona
ka lɛbid ya-nya'aŋi giligid on yi zin'isi'a na.
7 Ka kɔldaad wʋsa pʋbidi sigid Atɛukʋn,
amaa Atɛuk la pʋ pɛ'ɛnna.
Kɔldaad la yi zin'isi'a na la, ani ka ba na lɛb.
8 Si'el wʋsa mɔri gɛɛnlis,
li tʋʋg ninsaal pian'ad bɛn;
sɔ' nini nan zi' gɔsi tigɛ,
bɛɛ sɔ' tʋbir wʋm tigɛ.
9 Dinɛ pʋn kena la na lɛn kena,
ka dinɛ pʋn tʋm la na lɛn tʋm.
Si'el kae an bʋmpaal dunia kaŋa nii.
10 Si'el kae ka sɔ' na nyaŋi yɛl ye
‘Gɔsima, nɛ'ɛŋa anɛ bʋmpaallɛ!’
Ayei, li da pʋm bɛ nɛ yʋʋm banɛ gaad la sa,
li da pʋm bɛ nɛ ka ti zʋmaaŋ la nyaan kena.
11 Sɔ' pʋ lɛn tɛn'ɛsid zʋmaaŋ kanɛ gaad la nidib yɛla ya'asɛ;
hali ka banɛ na dɔl banɛ na ti kenna la nya'aŋ kʋ tiɛn ba yɛlaa.”
Baŋir ka' gbinnɛ
12 Mam kanɛ an Pa'an la da anɛ Israel na'ab Jerusalem tempʋʋgin. 13 Ka kpɛ'ɛŋi m mɛŋi zamis ye m baŋ ya'am an si'em, nɛ baŋiri zaŋi ken dunia nwa pʋʋgin yɛla wʋsa. Abɔnam yɛla nwa ka Wina'am zaŋi ziil ninsaaliba! 14 M da gɔsi nyɛ linɛ maal dunia nwa ni, ka li wʋsa anɛ zaalim wʋʋ fʋn na kat pɛbisʋg ye fʋ gban'e nɛ.
15 Dinɛ pɔnd la kʋ nyaŋi tiɛn sappii.
Ka linɛ kae la kʋ nyaŋi kaalɛ.
16 M tɛn'ɛsi m sʋʋnrin sa ye, “Gɔsima, m nɔbig ya ka mɔr ya'am hali gaad na'abanɛ wʋsa nam mi' sʋ'oe Jerusalem. M paam ya'am nɛ baŋir bɛdegʋ.” 17 Ka yʋ'ʋn nɔki m mɛŋi mak nɛ ya'am nɛ baŋir, ka lɛn vɛɛnsi mak gɛɛmis nɛ zɔn yɛla, ka yʋ'ʋn baŋ ye li wʋsa anɛ zaalim wʋʋ fʋn na kat pɛbisʋg ye fʋ gban'e nɛ. 18 Ya'am galisʋg lɛn anɛ sʋnsa'aŋ,
ka fʋ ya'a mɔr baŋiri galis li anɛ namisʋg.