12
1-2 Tiɛnm Wina'am onɛ maalif la fʋ dasannim saŋa,ka namisʋg dabisa la nam pʋ paae naa,
ka yʋma la da ti li'el na
ka fʋ yɛl ye, “Mam pʋ di malisimi li nii.”
Ka winnig la nɛ nɛɛsim nɛ nwadig
nɛ nwadbibis la nyaan sɔbigi lieb lik.
Ka saa nii naae ka saŋgbana na kpɛm bɛ.
3 Saŋkan la fʋ nu'ubanɛ daa mɔr paŋ la na kirid gba-gba
ka fʋ nɔba tadig.
Fʋ nyina na vɔn' ka kpɛlim bi'ela
ka kʋ lɛn nyaŋi ɔnbid ya'asɛ,
ka fʋ nini kʋ lɛn nyɛta
ka banɛ gɔsid takoro ni la gɔsid ka li an paan.
4 Fʋ tʋba na kpid ka fʋ kʋ wʋm suoraadin vuudɛ.
Fʋ mɛ kʋ lɛn wʋm nɛɛr bɛɛ yʋʋma vuudɛ;
amaa niimis kaasig na nief gbɛɛmin.
5 Saŋkan la ka fʋ ya'a bɛɛ agɔl fʋ na zɔt dabiem,
ka mɛ zɔt dabiem nɛ suorin sapu'ad yɛla.
Saŋkanɛ ka fʋ zuobid pɛlig farr wʋʋ gum nɛ
ka fʋ gɛɛn kennɛ ku'usid bi'el-bi'el
ka kʋ lɛm mɔr si'el yamlɛogɔ.
Ka fʋ yʋ'ʋn na kuli fʋ yin ka kʋ lɛn lɛb naa,
ka kʋkaasidib dɔl suoya kaasid.
6 Tiɛnmi Wina'am yɛla ka anzurifa zɔnt la nam pʋ kɛnsigɛ
bɛɛ sanlima laa la nwa'ae.
Ka ku'om yʋʋr la mɛ nam pʋ nwa'ae buliginɛ,
bɛɛ lɔbidiŋ nwiig la kɛnsigɛ.
7 Ka tan la na lɛb tannin,
ka siig mɛ na lɛb Wina'am kanɛ maal o la ni.
8 Pa'an la yɛl ye, “Li gbin kae! Li gbin kae! Si'el wʋsa ka' gbinnɛ.”
Naar yɛla
9 Pa'an la da ka'anɛ ya'am sɔb ma'aanɛ; amaa o mɛ da pa'an nidib ka ba paamid baŋir, ka la'as siilima bɛdegʋ digil. 10 O da ieednɛ ye o nyɛ pian'akanɛ an viki nɛ sida.
11 Ya'am dim pian'ad nwɛnɛ kɔnbkem duor nɛ. Ka ba siilima nwɛnɛ kuusa banɛ kpa' gban'e sʋ'ʋŋa. Wina'am onɛ aan ti kɔnbkem la tis nɛ' wʋsa. 12 M biiga, gu'usim ka da di'e pa'alsieba ka li ya'a ka' nɛ'.
Gbana bɛdegʋ sɔbir ka' bɛnnɛ, ka zamistɔɔg mɛ an gɛɛnlis.
13 Nannanna ti wʋmi li wʋsa,
yɛl la kʋʋsʋgʋ nwa:
zɔm Wina'am ka di'e o zi'ela la,
ka linɛ nar ye ninvʋsaal tʋm.
14 Bɔzugɔ Wina'am na kad si'el wʋsa saria,
la'am nɛ linɛ su'a wʋsa,
li ya'a an sʋm bɛɛ bɛ'ɛdɛ.