Dunia wʋsa zun'om Zugsɔb la
148
1 Zun'omi Zugsɔb la, haleluya!Zun'omi Zugsɔb la saŋgbana ni,
Zun'omi Zugsɔb la saazug.
2 Zun'omin o, yanam banɛ aan o maliaknam la,
Zun'omin o, yanam banɛ bɛɛ o san'an arezana ni la.
3 Winnig nɛ nwadiga, zun'omin o,
yanam banɛ an nwadbibis la wʋsa, zun'omin o.
4 Zun'omin o, yanam saŋgbana banɛ bɛɛ agɔla
nɛ ku'om linɛ bɛ saŋgbana zugin la.
5 Kɛlli ka ba zun'e Zugsɔb la yʋ'ʋr,
ka onɛ da pian' ka ba naam.
6 O zi'eli ba, ba bɛllim zin'ig ka ba bɛ saŋa wʋsa;
onɛ tis on gban'e si'el la ka li kʋdim kʋ gaadɛ.
7 Zun'omi Zugsɔb la teŋgbauŋʋn la,
yanam bʋnvʋtitada banɛ bɛɛ atɛukʋn
nɛ ku'ozulima ni la wʋsa;
8 sa-ian'asʋg nɛ sakuga, ku'om linɛ ga'aŋ nɛ saŋgbana,
nɛ sisi'etita'ar siakid o nɔɔr.
9 Yanam zuoya nɛ kʋkʋna zun'omin o,
tiis banɛ wan wala nɛ na'aziinr tiis;
10 mɔɔgin bʋnkɔnbid nɛ niigi,
bʋnvʋbaanlʋg nɛ niis banɛ ian'ad.
11 Na'anam banɛ bɛ teŋgbauŋ la zug nɛ tɛɛns la wʋsa,
12 na'akim nɛ pu'asada,
bʋnkʋt nɛ biis wʋsa zun'omin o.
13 Kɛl ka ba zun'e Zugsɔb la yʋ'ʋr,
ka o yʋ'ʋr la ma'aa gaad si'el wʋsa;
o vɛnlim la gat agɔla nɛ teŋin.
14 O tis o nidib la paŋ,
ka o nidib la zun'od o;
o mɔr o nimbanɛ an Israel dim la nyɔɔg hali.
Zun'omi Zugsɔb la, haleluya!