Zun'omi Wina'am onɛ an Paŋtita'ar Sɔb la
147
1 Zun'omi Zugsɔb la, haleluya!Li an sʋm hali nɛ tinamɛ na yʋ'ʋm zun'e ti Wina'am la,
li malis ka nar hali ye ti zun'e Zugsɔb la!
2 Zugsɔb la maligim mɛɛd Jerusalem;
ka la'asid Israel dim banɛ widigi bɛ teŋ zʋna la lɛbisid na.
3 O bʋgʋn banɛ sʋnya san'am la
ka ti'ebidi ba sapu'ad.
4 O mɛŋ pʋtɛn'ɛre gban'ad on bɔɔd ye nwadbibis la zem si'em
ka buonnɛ ba yʋda yinne-yinne.
5 Ti Zugsɔb la anɛ onɛ zu'oe ka mɔr kpi'euŋ;
on gban'ad si'el wʋsa gbin si'em la pʋ mɔr bɛnnɛ.
6 Zugsɔb la sʋŋid banɛ siedi ba mɛŋ la
amaa ka kɛt ka bugusim dim la lit teŋin.
7 Yʋ'ʋmmi bareka pʋ'ʋsim yʋʋma tis Zugsɔb la;
nwɛ'ɛmi kɔna tisi ti Wina'am la.
8 Onɛ pil agɔla nɛ saŋgbana;
ka kɛ ka saa niidi basid teŋgbauŋ zug
ka kɛ ka mɔɔd yi zuoya ni.
9 Onɛ tisid niigi diib
ka diisid agaung biis ban bɔɔd diib saŋsi'a.
10 O ya'amlɛog pʋ bɛ widi banɛ mɔr paŋ la nii,
bɛɛ o mɔr nyɛlʋg nɛ ninsaalib nɔba kpi'em si'em;
11 Zugsɔb la ya'amlɛog bɛ nɛ nimbanɛ zɔt o,
nɛ banɛ nɔki ba ti'iri niŋ o nɔŋilim linɛ ka' bɛn la ni.
12 Zun'omi ya Zugsɔb la, O Jerusalem dima;
Zun'omi ya Wina'am la, O Zion nidibaa,
13 ka li anɛ onɛ kɛ ka ya za'anɔya la kpi'em
ka tisidi ya nidib la bareka.
14 O kɛ ka sumbʋgʋsʋm bɛɛ ya titɔndisin
ka kɛ ka ya nyɛt diib linɛ an sʋm diti tigid.
15 Onɛ tisid teŋgbauŋ la nɔɔr;
ka o pian'ad la zɔt tɔ'ɔtɔ.
16 O yadigid sakuga wʋʋ gungum nɛ,
ka widigid mɛligim teŋin wʋʋ sisi'em da'ad uusʋg si'em la.
17 O kɛ ka sakuga lit wʋʋ kugbaanlʋg nɛ.
Anɔ'ɔn na nyaŋi zi'en waad kanɛ ka o kpa'ae bas na la ni?
18 O ɛɛn pian'anɛ tis ka li buoe;
ka kɛ ka sisi'em da'ae ka ku'om la pʋbig.
19 O nie o pian'adi tis Jakob yaas,
o wada nɛ o gban'ar ka o tis Israel dim.
20 O nan zi' maal nɛ'ɛŋa tis teŋ si'a;
ba zi' o wada la.
Zun'omi Zugsɔb la, haleluya!