M na zun'e fʋ yʋ'ʋr saŋa wʋsa
145
1 M na dʋ'ʋsi fʋ yʋ'ʋr, m Wina'am onɛ an Na'aba;m na zun'e fʋ yʋ'ʋr saŋa wʋsa.
2 M na zun'ʋf daar wʋsa
ka na'asif saŋa linɛ ka' bɛnnɛ.
3 Zugsɔb la galis nɛ ka nar nɛ zun'or;
sɔ' kae na nyaŋi maki baŋ on galis si'em la.
4 Zʋmaaŋ yinne na pa'ali fʋ yɛla tis zʋmaaŋ yinne;
ba na yɛli fʋ tʋʋm titada la an si'em.
5 Ba na pian' fʋ na'am pipilim nɛ fʋ vɛnlim la yɛla,
ka mam mɛ na tɛn'ɛsidi fʋ tʋʋmnyalima la an si'em.
6 Ba na yɛli fʋ tʋʋm kpi'ema nɛ fʋ zɔtim la yɛla,
ka man na mɔɔli fʋ tʋʋm titada an si'em.
7 Ba na maal sumalisim di'ema
fʋn an sʋm ka zu'oe si'em la zug,
ka yʋʋm nɛ sumalisim fʋ pʋpielim la yɛla.
8 Zugsɔb la an sʋm ka an nimbaanlzɔt,
o nɔŋilim zu'oya, ka o sʋnf pʋ duod tɔ'ɔtɔɔ.
9 Zugsɔb la an sʋm tis sɔ' wʋsa;
on maal si'el la wʋsa, o zɔti li nimbaanlig.
10 Zugsɔba, fʋn maal si'el la wʋsa na zun'ʋf
ka fʋ nidib la wʋsa pʋ'ʋsif bareka.
11 Ba na yɛli fʋ na'am la vɛnlim
ka pian' fʋ kpi'euŋ la yɛla.
12 Ala ka nidib na baŋi fʋ tʋʋma an si'em
nɛ fʋ na'am la mɔr pipilim ka vɛnl si'em.
13 Fʋ sʋ'ʋlim la na yuug ka kʋ mɔr bɛnnɛ,
ka zʋmaana wʋsa na nyɛɛ fʋ na'am la.
Zugsɔb la dɔlisid on kaanb si'em la nɛ sida
ka nɔŋ on maal si'el la wʋsa.
14 Zugsɔb la ti'ed banɛ bɔɔd liig la
ka duosid banɛ dig teŋinɛ zi'el agɔla.
15 Nidib wʋsa kpa' gɔsidi fʋ,
ka fʋ tisidi ba diib saŋa kanɛ nar.
16 Fʋ laki fʋ nu'us
ka tisid bʋnvʋr wʋsa o bɔɔdim.
17 Zugsɔb la mɔr pʋpielim o suoya wʋsa ni,
ka nɔŋ on maal si'el wʋsa.
18 Zugsɔb la li'ennɛ banɛ wʋsa buol o,
o li'en banɛ wʋsa buol o nɛ sida la.
19 Banɛ zɔt o la, o tisidi ba, ba bɔɔdim;
o wʋmi ba kaasig ka faandi ba.
20 Zugsɔb la gur banɛ nɔŋ o la wʋsa,
amaa o na san'am bugusim dim la wʋsa.
21 M nɔɔr na pian' zun'e Zugsɔb la.
Kɛl ka bʋnvʋr wʋsa zun'e o yʋ'ʋr kanɛ an kasi la
saŋa linɛ ka' bɛnnɛ.