Na'ab la pʋ'ʋs Wina'am bareka on nyaŋ o dataas la zug
144
1 Zun'omi Zugsɔb onɛ an m Tampiing la,onɛ pa'annɛ m nu'us tanp nwɛ'ɛb,
ka pa'annɛ m nu'ubibis zaba.
2 Onɛ aan m Wina'am kanɛ nɔŋim, nɛ m kpi'euŋ zin'ig,
onɛ aan m kpi'euŋ sɔb nɛ m faangid,
onɛ aan m gbanti'edʋg, ka m su'adim mɛŋ o san'an,
ka o nyaŋ tɛɛns banɛ bɛɛ m san'an la
ka kɛ ka m sʋ'ʋgi ba.
3 O Zugsɔba, ninsaal an bɔ ka fʋ ba'a bɛ nɛ o?
Ninvʋsaalib an bɔ ka fʋ tɛn'ɛsidi ba yɛla?
4 Ninsaal nwɛnɛ pɛbisim na yi nyɔnya ni na;
o dabisa nwɛnɛ ma'asim tuligid tɔ'ɔtɔ si'em la.
5 Zugsɔba, aansimi fʋ saŋgbana la, ka sig na;
si'isim zuoya la, ka kɛ ka nyɔ'ɔs yina.
6 Kɛl ka saa tansi widigi fʋ dataas la;
tɔɔnmi fʋ piema la ka ba zɔɔ widig.
7 Naanim agɔla tiɛn fʋ nu'ug teŋin na faanmi bas;
ka yaam ku'otita'ar la pʋʋgin
ka yisim teŋ zʋŋ dim la nu'usin,
8 banɛ nɔya pɛ'ɛl nɛ faad ma'aa,
ka ba nan zi' pian' sida baa bi'ela la.
9 M na yʋ'ʋm yʋʋm paalli tisif, O Wina'am;
M na nwɛ' kɔnne yʋ'ʋm yʋʋma tisif
10 fʋn Onɛ tisid na'anam nyaŋir,
ka sʋŋid David onɛ aan fʋ sankpan'asi,
yisid o zaba linɛ ziid kum la na pʋʋgin.
11 Faanmim ka yisim teŋ zʋŋ dim la nu'usin
banɛ nɔya pɛ'ɛl nɛ faad ma'aa,
ka nan zi' pian' sida baa bi'ela la.
12 Ala ka ti biribis na nwɛnɛ tibanɛ ka ba gu'uli ba sʋ'ʋŋa
ba na'akinnim saŋa nɛ,
ka ti bipumis na nwɛnɛ zan'antɔlis banɛ ka ba kpi'e ba
maal na'ayir ye li vɛnl.
13 Ti bʋya na pɛ'ɛl sʋ'ʋŋa
nɛ zʋʋd buudi wʋsa.
Ti pɛ'ɛs na wiak tusa piig-piig
ban kemmi ba zin'isi'a la;
14 ka ti niigi na mɔr paŋi ziid zitɛbisa.
Ba kʋ lɛn da'ae ti teŋ la zaŋguoma basɛ,
ba mɛ kʋ gban'e ti keŋ teŋ zʋŋɔ,
kaasig bɛɛ sʋnsa'aŋ kʋ lɛm bɛɛ ti suoraadinɛ.
15 Yɛlsʋm bɛ nɛ banɛ ka li sid na niŋ ala tisi ba,
nimbanɛ ka Zugsɔb aan ba Wina'am la.