Zugsɔb la mi' ninsaal ka o ba' bɛɛ o ni si'em
139
1 O Zugsɔba, fʋ kpansimi gɔska baŋim sʋ'ʋŋa.
2 Fʋ mi' m zin'ig nɛ m duor saŋa;
la'am nɛ fʋn bɛ lalli la fʋ mi' m pʋtɛnda wʋsa.
3 Fʋ mi' m yiib saŋa nɛ diginʋg saŋa;
fʋ mi' m suoya la wʋsa.
4 O Zugsɔba, pian'ʋkʋ ti bɛɛ m nɔɔrin saŋsi'a la
ka fʋ pʋn baŋi li.
5 Fʋ bɛɛ m tuon nɛ m nya'aŋ wʋsa;
ka kɛ ka fʋ paŋ la bɛ nɛ m.
6 Baŋir kaŋa buudi anɛ nyalima tisim,
li zu'onɛ galis ka m kʋ nyaŋi gban'e li gbinnɛ.
7 M na niŋ wala keŋ ka fʋ siig la pʋ bɛɛ m san'anɛ?
M na niŋ wala zɔ ka basi fɔ?
8 M ya'a dʋ saŋgbana ni fʋ bɛɛ anina;
M ya'a maali m dig zin'ig kpi'im teŋ fʋ bɛɛ ani.
9 M ya'a mɔrin kpʋkpama na nyaŋi iank wʋʋ bɛogʋ nied si'em la,
bɛɛ m zin'inɛ atɛuk nɔɔrin lallisa,
10 hali la'am nɛ ani, fʋ paŋ la nan kpɛn gurim,
fʋ datiuŋ nu'ug kanɛ mɔr kpi'euŋ la na kpɛn zanlim.
11 M ya'a yɛl ye, “Sida, lik la na su'am
ka nɛɛsim lieb yʋ'ʋŋʋ giligim,”
12 hali lik la kʋ an zibisʋgʋ fʋ san'anɛ;
li na nie nwɛnɛ nintaŋ,
bɔzugɔ lik la nwɛnɛ nintaŋi fʋ san'an.
13 Fʋnɛ maali m sʋnf;
ka ya'abi mɛ niŋi m ma pʋʋgin.
14 M zun'odif bɔzugɔ, fʋ maalim nɛ
ka m an bʋnnyalʋŋ nɛ bʋnzɔtir.
M mi' fʋ tʋʋmnyalima la yɛla sʋ'ʋŋa.
15 Man da an si'em la pʋ su'a fʋ san'anɛ;
man da su'a m ma pʋʋgin nɔbigid la,
nɛ m niŋgbina la da tɔ'ɔŋid taaba teŋ teŋir la,
16 fʋ nini da nyɛɛm ka ba nam pʋ du'a ma.
Dabisa banɛ aan m din la wʋsa
pʋn sɔbi digili fʋ gbauŋʋn la
ka ba wʋsa naan kɛn yinne-yinne na.
17 O Wina'am, fʋn tɛn'ɛsidi m yɛla si'em la anɛ sʋm galis!
Ba kal zu'onɛ hali!
18 M ya'a ye m kaali ba,
ba na zu'oe gaad titanbin'isi.
M ya'a gbisi duoe
m nan kpɛm bɛ nɛ fʋ san'an.
19 O Wina'am, m bɔɔdi fʋn na kʋ bugusnam la wʋsa!
Tɔɔmini m san'an, yanam banɛ an ninkʋʋdib la!
20 Ba pian'adi fʋ yɛla nɛ pʋtɛn'ɛbɛ'ɛd;
fʋ bi'emnam la san'amidi fʋ yʋ'ʋr.
21 O Zugsɔba, man kis banɛ kisif la
ka nɛ'ɛsid banɛ zan'asi fʋ nɔɔr la.
22 M kisi ba nɛ amɛŋa mɛŋa,
ka kaali ba paasi m dataasin.
23 Kpansimim ka baŋi m pʋtɛn'ɛr;
Makimim ka gɔsi m sʋnfʋ an si'em.
24 Gɔsim ye bɛ'ɛd bɛɛ m san'anɛɛ,
ka mɔrimi dɔlis suokanɛ pʋ mɔr bɛn la ni.