Zun'om Zugsɔb la nɛ fʋ sʋnf wʋsa
138
1 Zugsɔba, m na zun'ʋf nɛ m sʋnf wʋsa;m na yʋ'ʋm zun'ʋf “wina” la tuon.
2 M na sʋ'ʋnnɛ kpa' fʋ Pʋ'ʋsim Yir kanɛ an Kasi la
ka zun'e fʋ yʋ'ʋr
fʋ nɔŋilim nɛ fʋ sida la zug,
bɔzugɔ, fʋ kɛya ka fʋ yʋ'ʋr nɛ fʋ pian'ʋk la
gaad si'el wʋsa.
3 Man buol la, fʋ siaki tisim;
fʋ tisim sʋnkpi'euŋ ka kpɛmisimim.
4 O Zugsɔba, dunia na'anam ya'a wʋm fʋ nɔɔr pian'ad
ba wʋsa na zun'ʋf hali.
5 Ba na yʋ'ʋm Zugsɔb la an si'em la yɛla,
bɔzugɔ, Zugsɔb la na'am pipilim sid zu'oya.
6 La'am nɛ Zugsɔb la bɛɛ agɔla lalli la, o gɔsid tadimnam,
amaa banɛ mɔr nyɛɛsim la o bɛ nɛ lalli ka kpansidi ba.
7 La'am nɛ man ken yɛla pʋʋgin la,
fʋ guri m nyɔvʋr;
fʋ tiɛn fʋ nu'ugʋ gu' m bi'emnam banɛ sʋnya pɛlig la lɛbis,
fʋ paŋ tita'ar la ka fʋ nɔki faanm.
8 Zugsɔb la na maal on zi'el si'em tisim la;
O m Zugsɔba, fʋ nɔŋilim la bɛ nɛ saŋa wʋsa,
da bas tinam banɛ ka fʋ maal la.