Wina'am yinne la sid an Wina'am yɛlmɛŋir
115
1 Li ka' tinam dinnɛ, Zugsɔba, li ka' tinam dinnɛ;amaa fʋn yʋ'ʋr la na paam na'asi,
fʋ nɔŋilim nɛ fʋ sida la zug.
2 Bɔ ka tɛɛns la nidib yɛt ye,
“Ba Wina'am la bɛ ya?”
3 Ti Wina'am la bɛ arezana ni;
o tʋmnɛ dinɛ ka o bɔɔd.
4 Amaa ba bada la anɛ anzurifa nɛ sanlima,
ka nidib nu'us maali ba.
5 Ba mɔr nɔya, amaa ka kʋ nyaŋi pian',
ba mɔr nini ka pʋ nyɛtaa;
6 ba mɔr tʋba amaa ka pʋ wʋmma,
nɛ nyɔnya, amaa ka pʋ wʋm nyuugɔ;
7 Ba mɔr nu'us, ka pʋ tun'e babin na,
ka mɔr nɔba ka kʋ nyaŋi keŋi,
ba mɛ kʋ tun'e kɛ ka sɔ' wʋmi ba pian'adɛ.
8 Banɛ maali ba la na nwɛnɛ ba nɛ,
ban nɛ banɛ niŋi ba yadda la wʋsa.
9 Israel dima, niŋimi Zugsɔb la yadda,
ka onɛ sʋŋidi ya ka guri ya.
10 Aaron yidima, niŋimi Zugsɔb la yadda,
ka onɛ sʋŋidi ya ka aan ya zaba gbanti'edʋg.
11 Yanam banɛ zɔt Zugsɔb la, niŋimin o yadda
ka onɛ sʋŋidi ya ka aan ya zaba gbanti'edʋg.
12 Zugsɔb la tɛnri ti yɛla ka na niŋi ti bareka:
o na niŋ Israel dim bareka,
o na niŋ Aaron yidim bareka,
13 banɛ zɔt Zugsɔb la o niŋidi ba bareka,
banɛ an ninvʋbɛda nɛ tadimnam wʋsa.
14 Zugsɔb la na kɛ ka ya wiak,
yanam nɛ ya biis wʋsa.
15 Zugsɔb onɛ maal arezana nɛ teŋgbauŋ la,
na niŋi ya bareka.
16 Saŋgbana linɛ bɛ agɔla la wʋsa anɛ Zugsɔb la din,
amaa o nɔk teŋgbauŋʋ tis ninsaal.
17 Li ka' kpi'imnam banɛ kpii
dig kpi'im teŋ la zun'od Zugsɔb la.
18 Li anɛ tinam banɛ nan vʋe la na zun'od Zugsɔb la,
nannanna nɛ saŋa kanɛ ka' naarɛ.
Zun'omi Zugsɔb la, haleluya.