Onɛ ka Zugsɔb faaɛn o yi kumin la yʋʋm
116
1 M nɔŋ Zugsɔb la on wʋmi m sɔsʋg la zug;o wʋmi m kaasig ka zɔɔ m nimbaanlig.
2 Bɔzugɔ, o yɔ'ɔg o tʋbiri tisim,
m na buon o saŋa wʋsa.
3 Kum lɔb nwiisi giligim zin'ig wʋsa,
ka nyaŋi gban'am;
ka yɛla nɛ sʋnsa'aŋ paae m.
4 Ani ka m buol Zugsɔb la yʋ'ʋr ye,
“Zugsɔba, faanmim!”
5 Zugsɔb la an sʋm ka an pʋpiel;
ti Wina'am la nimbaanlzɔɔr zu'oya.
6 Zugsɔb la gur talis;
man daa bɔɔd sʋŋir la, o daa faanm.
7 M siigaa, lɛn vʋ'ʋs ya'as,
ka Zugsɔb la tʋm tʋʋm sʋma tisif.
8 Zugsɔbaa, li anɛ fʋnɛ faanm nyɔvʋri yis kumin,
fʋ duusi m ninta'am
ka guri m nɔba ka m pʋ tu'ugɛ,
9 ye m ken fʋn Zugsɔb la tuon
teŋ kanɛ ka banɛ nan vʋe bɛ la.
10 Hali baa man yɛl ye, “M bɛ nɛ namisʋgʋn la”,
m niŋ o yadda.
11 Lin daa wʋmimi galis la, m ya'am fɛndig ka m yɛl ye,
“Ninsaalib wʋsa anɛ ziri dim.”
12 M na niŋ wala yɔ Zugsɔb la
on maali m sʋm si'em la?
13 M na ʋk bʋtiŋ kanɛ pa'an faangir la agɔla
ka buol Zugsɔb la yʋ'ʋr.
14 M na maal man zi'el nɔɔr ye m na maal si'eli tis Zugsɔb la
ka o nidib la wʋsa nini nyɛ.
15 Zugsɔb tʋmtʋmnib la yinne ya'a kpi,
li zabid Zugsɔb la sʋʋnr nɛ hali.
16 Sida, Zugsɔbaa, m anɛ fʋ tʋmtʋm;
m anɛ fʋ tʋmtʋm pu'ak biig.
Fʋ faanmi yis yɛla pʋʋgin.
17 M na maal bareka pʋ'ʋsim maannɛ tis Zugsɔb la
ka buol o yʋ'ʋr.
18 M na maal man zi'el nɔɔr ye m na maal si'eli tis Zugsɔb la
ka o nidib la wʋsa nini nyɛ.
19 Zugsɔb Yir la zakin ka m na maali li
ka li zi'e Jerusalem tempʋʋgin.
Zun'omi Zugsɔb la, haleluya!