Wina'am an na'atita'ar
99
1 Zugsɔb la an Na'ab,kɛl ka tɛɛns la nidib kirid o tuon.
O zin'inɛ o na'am gbauŋ zug Kerubnam la teŋsʋk,
kɛl ka dunia la dammid.
2 Zugsɔb onɛ bɛ Zion tempʋʋgin la galis nɛ;
ba zun'od o tɛɛns la wʋsa ni.
3 Kɛl ka ba zun'e fʋ yʋ'ʋtita'ar linɛ galis ka mɔr zɔtim la.
O anɛ onɛ an Kasi.
4 Na'ab la anɛ na'atita'ar, o nɔŋ yɛlsida.
Zugsɔba, fʋ kɛya ka sida zi'en;
Jakob yidimin la ka fʋ maal linɛ an sida
ka tʋm linɛ dɔl suor.
5 Dʋ'ʋsimi ti Zugsɔb Wina'am la
ka zun'e o, o nɔba zi'elʋg zin'ig;
ka o anɛ Kasi.
6 Moses nɛ Aaron da paas o maanmaannib la kallin,
Samuel da paas banɛ da buon o yʋ'ʋr la kallin;
ba da buol Zugsɔb la ka o wʋm tisi ba.
7 O da naan saŋgbauŋ linɛ zi'e sappi la ni pian' tisi ba;
ba da dɔlisid o wada nɛ zi'ela banɛ ka o tisi ba la.
8 Ti Zugsɔb Wina'am,
fʋ da wʋm tisi ba;
fʋ da anɛ Wina'am kanɛ kɛt Israel taali basid,
la'am nɛ fʋn da namisi ba, ba pɔ'ɔgir zug la.
9 Dʋ'ʋsimi ti Zugsɔb Wina'am la
ka zun'e o, o zuor linɛ an kasi la ni,
ka ti Zugsɔb Wina'am la anɛ kasi.