Yʋ'ʋm yʋʋm paalli tis Zugsɔb la
98
1 Yʋ'ʋmmi yʋʋm paalli tis Zugsɔb laka o tʋm tʋʋmnyalima;
o paŋ linɛ an kasi la nɛ o datiuŋ nu'ug la
tʋm faangir tʋʋma tis o.
2 Zugsɔb la pa'al o faangir
ka nie o pʋpielim la tis tɛɛns wʋsa.
3 O tiɛn o nɔŋilim nɛ o sida la nɛ Israel dim;
dunia bɛn wʋsa nyɛ ti Wina'am la faangir.
4 Teŋgbauŋ la wʋsa yʋ'ʋm nɛ sumalisim tisid Zugsɔb la,
yʋ'ʋmmi ka nwɛ' bʋnnwɛ'ɛda;
5 nwɛ'ɛm kɔnne tis Zugsɔb la,
yʋ'ʋm ka nwɛ' kɔn,
6 Piebim na'atana nɛ na'atana;
tansim nɛ sumalisim Zugsɔb onɛ an na'ab la tuon.
7 Kɛl ka Atɛuk la maligim dam, nɛ linɛ bɛɛ li pʋʋgin wʋsa,
la'am nɛ dunia nɛ banɛ bɛɛ anina wʋsa.
8 Kɛl ka kɔldaad la pʋ'ʋs nu'us,
ka kɛ ka zuoya la la'asi yʋ'ʋm nɛ sumalisim;
9 kɛl ka ba yʋ'ʋm Zugsɔb la tuon,
ka o kenna ye o kad teŋgbauŋ la saria.
O na kad dunia la saria nɛ pʋpielim
nɛ nidib la ka baregaŋ kae.