Zugsɔb la an Na'ab
97
1 Zugsɔb la an na'ab, kɛl ka teŋgbauŋ la sʋnf ma'ae;kɛl ka tembanɛ bɛ ku'om sʋʋgin lallisa la mɔr sumalisim.
2 Saŋgbana nɛ lik tita'ari gilig o;
pʋpielim nɛ yɛlsida aan o na'am la ɛɛnbir.
3 Bugum bɛɛ o tuon
ka dit o bi'emnam zin'ig wʋsa.
4 O nɛɛsim linɛ nwɛnɛ sa-ian'asʋg la nie dunia la;
ka teŋgbauŋ la nyɛ ka kirid.
5 Zuoya la nyɛligidi nwɛnɛ sinbi'en Zugsɔb la tuon,
Zugsɔb onɛ sʋ'oe teŋgbauŋ wʋsa la tuon.
6 Saŋgbana la mɔɔnnɛ o pʋpielim yɛla,
ka nidib la wʋsa nyɛt o na'am la vɛnlim.
7 Banɛ pʋ'ʋsid bada la di nyan,
yanam banɛ nwɛ'ɛd nyɔ'ɔgi ya bada yɛla
nɛ ya wina la wʋsa, zun'omi Zugsɔb la!
8 Zion wʋmya ka maal sumalisim
ka Juda teŋkpɛmis la mɔr sumalisim
fʋn kat saria si'em la zug, O Zugsɔba.
9 O Zugsɔba, fʋnɛ an Onɛ Gaad Si'el wʋsa teŋgbauŋ la zug;
fʋ nyɛt zun'ori gat wina banɛ bɛ wʋsa.
10 Kɛl ka banɛ nɔŋ Zugsɔb la kisig bɛ'ɛd,
bɔzugɔ o gu'ud banɛ dɔl o nɛ sida la nyɔvʋr
ka yisidi ba bugusim dim la nu'usin.
11 Nɛɛsim nie tis pʋpielim dim la,
ka sumalisim bɛ nɛ banɛ pʋ mɔr gba'ar la.
12 Yanam banɛ an pʋpielim dim la, maalimi sumalisim,
ka zun'e o yʋ'ʋr kanɛ an kasi la.