Yʋ'ʋmmi yʋʋm paalli tis Zugsɔb la
96
1 Yʋ'ʋmmi yʋʋm paalli tis Zugsɔb la;teŋgbauŋ wʋsa, yʋ'ʋm tis Zugsɔb la.
2 Yʋ'ʋm tis Zugsɔb la, zun'om o yʋ'ʋr;
mɔɔlim o faangir la dabisir wʋsa pʋʋgin.
3 Yɛlimi tɛɛns la o na'am pipilim la an si'em,
mɔɔlim o tʋʋmnyalima la nidib wʋsa sʋʋgin.
4 Ka Zugsɔb la an onɛ galis ka nar nɛ zun'or;
li sʋm ye ti zɔɔ o gaad wina wʋsa.
5 Bɔzugɔ wina banɛ bɛ tɛɛnsin la anɛ bada,
amaa Zugsɔb la maal agɔla.
6 Vɛnlim nɛ kpi'euŋ ma'aa gilig o;
paŋ nɛ na'am pipilim pɛ'ɛl o yin la.
7 Yanam nimbanɛ bɛ tɛɛnsin la wʋsa, zun'omi Zugsɔb la!
Zun'omi Zugsɔb la, o na'am nɛ o paŋ la zug.
8 Zun'omi Zugsɔb la wʋʋ o yʋ'ʋr la nar si'em;
mɔri piini kɛɛn o zakin la na.
9 Zun'omi Zugsɔb la o vɛnlim nɛ on an kasi la zug;
teŋgbauŋ la wʋsa kem o tuon na nɛ kikirʋg.
10 Yɛlimi tɛɛns la wʋsa sʋʋgin ye,
“Zugsɔb la an Na'ab!”
Dunia la zi'enɛ kiŋ-kiŋ, ka kʋ vurigɛ;
o na kad nidib la saria ka baregaŋ kae.
11 Kɛl ka agɔla nɛ teŋ la maal sumalisim.
Kɛl ka Atɛuk nɛ linɛ bɛɛ li pʋʋgin wʋsa
maligim tans agɔla.
12 Kɛl ka karinyana nɛ pɔɔd la wʋsa maal sumalisim
nɛ linɛ bɛɛ ba pʋʋgin wʋsa.
Tiis banɛ bɛ sian'arin la yʋ'ʋm nɛ sumalisim;
13 ba na yʋ'ʋm zun'e Zugsɔb la, bɔzugɔ,
o na kena kad teŋgbauŋ la saria.
O na kad dunia la saria nɛ pʋpielim;
o na kad nidib la saria nɛ sida.