Bareka pʋ'ʋsim yʋʋm
95
1 Kem na ka ti yʋ'ʋm nɛ sumalisim tisi ti Zugsɔb la;kɛl ka ti tans agɔla tisi ti Tampiing onɛ aan ti Faangid la!
2 Kɛlli ka ti kɛɛn o san'an na nɛ bareka pʋ'ʋsim
ka nwɛ' bʋnnwɛ'ɛda ka yʋ'ʋm zun'e o yʋ'ʋr!
3 Ka Zugsɔb la an Wina'am tita'ar,
ka an na'akanɛ gat wina wʋsa.
4 Teŋgbauŋ la nɛ li zulʋŋ wʋsa bɛ nɛ o nu'ugin
ka zuoya la zut mɛ anɛ o din.
5 Atɛuk la anɛ o din, bɔzugɔ onɛ maali li,
ka o nu'us lɛm maal teŋgbauŋ la.
6 Kem na ka ti zun'e o nɛ na'asi,
kɛl ka ti igin teŋin wɔ'ɔg Zugsɔb onɛ maali ti la;
7 ka onɛ aan ti Wina'am ka ti aan o nidib,
ti nwɛnɛ kɔnbidi bɛɛ o karinyauŋin,
ka an kɔnbbanɛ ka o gur.
Zina, ya ya'a wʋm o kʋkɔr,
8 yanam da digilimi ya sʋnya zan'as Wina'am
wʋʋ yanamɛ da niŋ Meriba mɔɔgin si'em la.
Ka mɛ da niŋ wʋʋ yanamɛ da niŋ Masa pipirigin si'em la;
9 zin'ikanɛ ka ya da makim ka kpansim la,
la'am nɛ yanamɛ nyɛɛm tʋʋma la.
10 Yʋma pisnaasi ka m sʋnf da pɛlig nɛ zʋmaaŋ kan la dim;
ka m yɛl ye, “Ba anɛ nimbanɛ ka ba ya'am fɛndig,
ka pʋ baŋ man suoya la an si'em.”
11 Ala ka m sʋnf da pɛlig nɛ ba ka m pɔ nɔɔri zi'el ye,
“Ba kʋdim kʋ kpɛn' m vʋ'ʋsʋm zin'igin laa.”