Zugsɔb la an Sariakat
94
1 O Zugsɔba, Wina'am kanɛ yɔɔd sammɛ,fʋn Wina'am kanɛ yɔɔd sam la, niem na!
2 Duom agɔl, fʋn onɛ an teŋgbauŋ Sariakata;
yɔɔm nyɛɛsim dim la lin nar ye ba di'e si'em!
3 Bɔ ka li yuugida, O Zugsɔba?
Bɔ ka bugusnam la maannɛ ba ya'amin ka li yuugida?
4 Ba pian'ad nɛ tita'alim;
tʋʋmbɛ'ɛd dim la wʋsa dʋ'ʋsidi ba mɛŋ.
5 Ba san'amidi fʋ nidib la, O Zugsɔba;
ka mugusid banɛ ka fʋ gaŋ ka ba aan fʋ faar la.
6 Ba kʋʋd pʋkɔnya nɛ saam nɛ kpiibis wʋsa.
7 Ba yɛt ye, “Zugsɔb la pʋ nyɛta;
Jakob Wina'am la pʋ kɛlisida.”
8 Kɛlisimi, yanam ya'amka'alʋg dim banɛ bɛ nidib la sʋʋgin la;
yanam banɛ an zɔn la, bʋndaar ka ya na baŋ ya'am?
9 Onɛ maal tʋbir la pʋ wʋmmaa?
Onɛ maal nif la pʋ nyɛtaa?
10 On kanɛ tɛɛgid tɛɛns tʋba la kʋ namisi yaa?
On kanɛ pa'an nidib la na kɔ'ɔŋ ya'am?
11 Zugsɔb la mi' ninsaal pʋtɛn'ɛr;
o mi' ye ba tɛn'ɛsa anɛ zaalim.
12 Ninkanɛ ka fʋ tɛɛg o tʋbir mɔr Wina'am bareka, Zugsɔba,
ninkanɛ ka fʋ pa'annɛ fʋ wada la;
13 tɔɔg saŋa fʋ tisid o yɔlisim,
ti paae saŋkanɛ ka ba tu bʋmbɔk
ka bugusim sɔb lii li ni.
14 Bɔzugɔ Zugsɔb la kʋ zan'as o nidiba;
o kʋ tam banɛ aan o faar la yɛla.
15 Sida nɛ pʋpielim na lɛm bɛ sariakadib zin'igin,
ka banɛ pʋ mɔr gbada la na dɔlli li.
16 Anɔ'ɔnɛ na duoe zab nɛ bugusim dim la tisi ma?
Anɔ'ɔnɛ na zi'enɛ m nya'aŋi zab nɛ tʋʋmbɛ'ɛd dim la?
17 Zugsɔb la ya'a pʋ sʋ'ʋŋi ma,
li kʋ yuugɛ ka m dig kum zin'igin baanlimm.
18 Man daa yɛl ye, “M nɔbir sadigid la,”
Zugsɔba, fʋ nɔŋir la daa sʋŋim.
19 Man daa lɛn zi' man fɛndigidi lɛbid zin'isi'a la,
fʋ daa bʋgʋli m sʋʋnr ka kɛ ka m nyɛ sumalisim.
20 Na'akanɛ pʋ tu'ad sida na nyaŋi la'as nɛ fʋʋ?
Ayei! On zi'el si'el la pʋ dɔl suorɛ.
21 Ba ɛɛnti la'as nɛ gban'e pʋpielim sɔb yɛla bɛ'ɛd,
ka kʋʋs sida sɔb ye o nar nɛ kum.
22 Amaa Zugsɔb la yʋ'ʋn liebi m kpi'euŋ zin'ig,
nɛ m Wina'am, onɛ an tampinkanɛ ka m su'ad o san'an.
23 O na yɔɔ ba, ba tʋʋmbɛ'ɛd la yɛla
ka san'ami ba, ba bugusim la zug;
ti Zugsɔb Wina'am la na san'ami ba.