Wina'am anɛ ti sʋŋid
91
1 Banɛ zɔti ken Onɛ Gaad Si'el wʋsa san'ani su'ad lana nyɛ Wina'am Onɛ an Paŋtita'ar sɔb la ma'asim vʋ'ʋs.
2 M na pian' Zugsɔb yɛla ye,
“O anɛ m suak nɛ m kpi'euŋ zin'ig,
m Wina'am la ka m niŋ o yadda.”
3 Sida, o na sʋ'ʋŋif ka fʋ yi bɛndis pʋʋgin
nɛ ban'abɛ'ɛd linɛ kʋʋd nidib hali la pʋʋgin mɛn.
4 O na lusi fʋ o kpʋkpama la ni,
ka o biaunk lɛuŋʋn ka fʋ na nyɛ suak zin'ig;
o yɛlsida la na gurif ka zabi tisif.
5 Fʋ kʋ zɔt dabiem yʋ'ʋŋ
bɛɛ fʋ zɔ piema banɛ ian'ad nintaŋ fiaʋn-fiaʋn la.
6 Fʋ kʋ zɔt ban'abɛ'ɛd linɛ bɛ likin la,
bɛɛ wiim linɛ kʋʋd nidib nintaŋ tisʋʋs laa.
7 Nidib tusa na liti fʋ baba,
ka tusa piiga li fʋ datiuŋ,
amaa li kʋ li'eli fɔ.
8 Fʋ nini ma'aa na nyɛ
ka baŋ bugusim dim la di'ed namisʋg si'em.
9 Fʋ ya'a kɛ ka Onɛ Gaad Si'el wʋsa la aan fʋ bɛllim zin'ig;
Zugsɔb onɛ an man suak zin'ig la;
10 ala ka yɛlbɛ'ɛd kʋ paae fɔ,
bɛɛ tɔɔg li'eli fʋ yinne.
11 Fʋn zug, o na tis o maliaknam nɔɔr
ka ba gurif, fʋn ken zin'isi'a wʋsa;
12 ba na mɔri fʋ ba nu'usin
ka fʋ kʋ tu'ugi fʋ nɔbir nɛ kugirɛ.
13 Fʋ na nɔ gbigim nɛ dunduug;
fʋ na nɔ gbigimtita'ar nɛ wa'akpɛuŋ.
14 Zugsɔb la yɛl ye,
“On nɔŋim la zug, m na faaɛn o;
M na gur o, on mi' m yʋ'ʋr la zug.
15 O na buolim ka m na siak;
yɛla ya'a ti paae o, m na bɛ nɛ o,
ka na'as o, ka faaɛn o.
16 M na kɛ ka o nyɔvʋr wa'am ka o sʋnf ma'ae
ka pa'al o m faangir.”