GBAUŊ LINƐ PAAS ANAASI
(Yʋʋma 90-106)
Wina'am nɛ ninsaal yɛla
90
1 Zugsɔba, fʋnɛ aan ti bɛllim zin'igzʋmaana wʋsa ni.
2 Saŋkanɛ ka zuoya da nan kae la
bɛɛ teŋgbauŋ nɛ dunia da nan kae la,
ka fʋ da bɛ, ka na kpɛn bɛ saŋa wʋsa.
3 Fʋ lɛbisid ninsaalib titanin,
ka yɛl ye, “Ninsaaliba, lɛmmi teŋin.”
4 Dabisa tusa fʋn san'an nwɛnɛ dabisir yinne na gaad,
bɛɛ yʋ'ʋŋʋ na sɔb ka bɛog nie.
5 Kum linɛ nwɛnɛ gbɛɛm la ni ka fʋ uusid ninsaalibi ken;
ba nwɛnɛ mɔbiigʋ na tans bɛkɛung na.
6 La'am nɛ lin yi bɛogʋn na an mɔpaala la,
zaam ti ma'ae la ka li ʋki kʋdig.
7 Fʋ sumpɛɛn la san'amidi ti
ka kpɛn'ɛsidi ti dabiem.
8 Fʋ digili ti tʋʋmbɛ'ɛd la fʋ tuon,
ka ti tʋʋmbɛ'ɛd linɛ su'a la nie nyain fʋ san'an.
9 Fʋ sʋnpɛɛn la kɛnɛ ka ti kpiid tɔ'ɔtɔ,
ka ti yʋma ya'a ti wae naarin la ti sin'im nɛ ma'aa.
10 Ti nyɔvʋr wa'alim anɛ yʋma pisyɔpɔi,
ka ti ya'a mɔr paŋ, li na paae yʋma pisnii.
La'am nɛ wala, li saŋa la anɛ yɛltɔɔd nɛ sʋnsa'aŋ ma'aa;
ka yʋma la gat tɔ'ɔtɔ,
wʋʋ niiŋe ianki gaadnɛ.
11 Anɔ'ɔnɛ mi' fʋ sumpɛɛn la galis si'em?
Fʋ sumpɛɛn la zu'onɛ nwɛnɛ lin nar ye ba zɔtif si'em la.
12 Pa'alimi ti ka ti baŋi ti dabisa bɛn,
ka ala ka ti na zamis ya'am.
13 Fʋ sʋnpɛɛn la na yuugi paae wala bɛnnɛ, O Zugsɔba?
Zɔm tinam banɛ aan fʋ sankpan'asnam la nimbaanlig.
14 Kɛl ka fʋ nɔŋilim linɛ bɛ bɛkɛung la sia'ali ti,
ka ti na yʋ'ʋm yʋʋma wɔ'ɔgif
ka maal sumalisim daar wʋsa.
15 Kɛl ka ti sumalisim la yuug
wʋʋ dabisbanɛ ka fʋ tisi ti namisʋg la,
nwɛnɛ yʋma bɛdegʋ banɛ ka ti nyɛ sʋnsa'aŋ la.
16 Pa'alimi ti fʋ tʋʋma la an si'em
ka kɛ ka ti biis nyɛ fʋ vɛnlim.
17 Kɛl ka fʋn Zugsɔb Wina'am la nimbaanlzɔɔr bɛ nɛ ti;
ka kɛ ka ti nu'ug tʋʋma zi'en sʋ'ʋŋa.
Ɛɛn, kɛl ka ti nu'ug tʋʋma zi'en!