Teŋ la namisʋg saŋa yʋʋm
89
1 M na yʋ'ʋm Zugsɔb nɔŋilim tita'ar la yɛla;fʋ sida la an si'em la, m na pian' nɛ m nɔɔr
ka zʋmaana wʋsa baŋ.
2 M na yɛl nyain ye fʋ nɔŋilim la zi'enɛ sʋ'ʋŋa saŋa wʋsa,
ka fʋ yɛlsida la bɛ saŋa wʋsa wʋʋ saŋgbauŋ nɛ.
3 Fʋ yɛl ye, “M maal nɔnaar nɛ onɛ ka m gaŋ la,
m pɔɔ zi'el David onɛ aan m tʋmtʋm la ye,
4 ‘M na kɛ ka fʋ tuŋ la bɛ saŋa wʋsa
ka fʋ na'am la zi'en kiŋ-kiŋ zʋmaana wʋsa ni.’ ”
5 O Zugsɔba, agɔla zun'odif fʋ nyalima tʋʋma la,
ka nimbanɛ bɛɛ fʋ kasi la'asʋg zin'igin la mɛ zun'odif fʋ sida la yɛla.
6 Anɔ'ɔnɛ bɛɛ agɔla na nyaŋi mak nɛ Zugsɔb la?
Banɛ bɛ arezana la wʋsa sʋʋgin
anɔ'ɔnɛ nwɛnɛ Zugsɔb la?
7 Banɛ an kasi la la'asʋg zin'igin ba zɔt Wina'am hali;
o anɛ onɛ galis hali, ka banɛ gilig o la wʋsa zɔt o dabiem.
8 O Zugsɔb Paŋtita'ar Sɔba, anɔ'ɔnɛ bɛ nwɛnɛ fʋ?
Fʋ anɛ Paŋ Sɔb, O Zugsɔba,
ka fʋ sida la bɛ si'el wʋsa ni.
9 Fʋnɛ sʋ'oe Atɛuk linɛ mɔr paŋ la;
li ku'opila la ya'a ti duoe nɛ paŋ,
fʋ kɛt ka li lɛbidi niŋid baanlimm.
10 Fʋ da san'am Arahab yɔri-yɔri
wʋʋ nid ka ba kʋ la;
fʋ nɔki fʋ paŋ tita'ar la widigi fʋ dataas.
11 Agɔla anɛ fʋ din, teŋgbauŋ mɛ anɛ fʋ din;
fʋnɛ maal dunia nɛ linɛ bɛɛ li pʋʋgin wʋsa.
12 Fʋnɛ maal ya-datiuŋ nɛ ya-dagɔbʋg;
Tabo nɛ Hemon zuoya yʋ'ʋmnɛ nɛ sumalisim fʋ yʋ'ʋrin la.
13 Fʋ kpʋkpauŋ la mɔr kpi'euŋ hali;
ka fʋ nu'ug la mɔr paŋ
fʋ datiuŋ nu'ug la bɛ agɔla hali nɛ girima.
14 Pʋpielim nɛ sida aan fʋ na'am la ɛɛnbir
nɔŋilim nɛ yɛlsida gaadi fʋ tuon.
15 Wina'am, bareka bɛ nɛ banɛ zun'odi fʋ yʋ'ʋr la,
nɛ banɛ kennɛ fʋ nɛɛsimin la, O Zugsɔba.
16 Ba maan sumalisim fʋ yʋ'ʋrin la saŋa wʋsa;
fʋ pʋpielim la zug ka ba maan sumalisim.
17 Fʋnɛ aan ti paŋ nɛ ti vɛnlim,
fʋ nɔŋir zug ka fʋ tisi ti nyaŋir.
18 Asida, tinam ti'ed anɛ Zugsɔb la,
Israel dim Wina'am Onɛ An Kasi la sʋ'oe ti Na'ab la.
Wina'am zi'el nɔɔri tis David
19 Fʋ da pian' nier pʋʋgin
tis banɛ dɔllif nɛ sida la, ka yɛli ba ye,
M tis zabzabid la paŋ;
M gaŋ dasaŋ nidib la sʋʋginɛ dʋ'ʋs o.
20 David onɛ aan m tʋmtʋm la ka m gaŋ;
ka nɔk malʋŋ kpaam bu'oe niŋ o zug.
21 M kpi'euŋ la na bɛ nɛ o kiŋ-kiŋ;
sida, m paŋ la na tis o kpi'euŋ.
22 Dataa kae na nyaŋ oo;
bugusim sɔb kae na mugus oo.
23 M na wɔnrigi o bi'emnam banɛ bɛɛ o tuon la
ka nwɛ' banɛ pʋ bɔɔd o yɛla la bas teŋin.
24 M sida nɔŋilim la na bɛ nɛ o,
ka m yʋ'ʋr pʋʋgin ka o paŋ la na dʋ.
25 M na kɛ ka o sʋ'ʋlim paae atɛuk,
ka o paŋ la paae kɔldaad la.
26 O na buolim ye, “Fʋnɛ an m Ba',
m Wina'am onɛ an m Tampiing nɛ m Faangid la.”
27 M na lɛn gaŋ o ka o aan m bikpɛɛm,
onɛ na an na'akanɛ gat na'anam wʋsa teŋgbauŋ la ni.
28 M na kɛ ka m nɔŋilim la kpɛn bɛ nɛ o saŋa wʋsa,
ka mam nɛ on nɔnaar la kʋ viigɛ.
29 M na kɛ ka o tuŋ la bɛ saŋa wʋsa,
o na'am la na yuug wʋʋ saŋgbana yuugid si'em la.
30 “O biis ya'a tami m wada la
ka pʋ dɔlli m zi'ela laa,
31 ba ya'a san'ami m gban'ar
ka pʋ dɔlli m wada laa,
32 m na zaŋ balaari namisi ba, ba tʋʋmbɛ'ɛd la zug,
ka fiebi ba nɛ sisanbig ba pɔ'ɔgir la zug.
33 Amaa m kʋ yisi m nɔŋilim la David san'anɛ,
bɛɛ kɛ ka man gban'e si'em o yɛla la pʋ niŋa asida.
34 M kʋ san'ami m nɔnaar la
bɛɛ tiaki m nɔɔri pian' si'el laa.
35 M yʋ'ʋr kanɛ an kasi la zugɔ, m pɔ nɛ vuguri,
ye m kʋ fa David baa bi'elaa.
36 O tuŋ la na bɛ saŋa wʋsa
ka o na'am la mɛ na bɛ saŋa wʋsa
wʋʋ winnigi bɛ si'em la.
37 Li na kpɛn bɛ saŋa wʋsa wʋʋ nwadig,
linɛ an sida kasɛti bɛ saŋgbauŋin la.”
Na'ab la fabin ban nyaŋ o la zug
38 Amaa, Zugsɔba, fʋ zan'as o,
fʋ sʋnf pɛlig nɛ onɛ ka fʋ gaŋ ka bu'oe malʋŋ kpaam niŋ o zug la.
39 Fʋ zan'as nɔnaar linɛ ka fʋ pɔɔ zi'eli fʋ tʋmtʋm la
ka vɛn'ɛlim o na'am zupibig la dian'adin.
40 Fʋ nwa'ae o zaŋguoma wʋsa bas
ka kɛ ka o kpi'euŋ zin'is la lieb dabɔɔd.
41 Banɛ dɔl ani gat la wʋsa zuud o la'ad,
ka o yʋ'ʋn lieb bʋnla'adiri tis o kpi'es.
42 Fʋ tis o bi'emnam la kpi'euŋ;
ka kɛ ka o dataas wʋsa maan sumalisim.
43 Fʋ kɛns o giinla zaba ni
ka pʋ sʋŋ o tanpinɛ.
44 Fʋ kɛya ka o vɛnlim la naae,
ka san'am o na'am paŋ la.
45 Fʋ nwaae o na'akinnim saŋa ka li niŋ giŋa;
ka kɛ ka nyan pil o wʋʋ fuug nɛ.
46 Bɔ ka fʋ su'a fʋ mɛŋ ka li yuugida, O Zugsɔba?
Bɔ ka fʋ sʋnf la'aŋ bugum?
47 Tɛnri m nyɔvʋri naad tɔ'ɔtɔ si'em la.
Fʋ maal ninsaalib wʋsa ka ba pʋ mɔr gbinnɛ.
48 Anɔ'ɔn lɛɛ na vʋe ka kʋ kpi,
bɛɛ faaɛn o mɛŋ nɛ paŋi zɔ ka bas Ayaʋgɔ?
49 O Zugsɔba, fʋ nɔŋilim linɛ da zu'oe hali la bɛɛ yaanɛ,
linɛ ka fʋ sida pʋʋgin ka fʋ da pɔɔ zi'el David la?
50 M Zugsɔba, tiɛnm ban la'adi fʋ tʋmtʋm la si'em,
tiɛnm tɛɛns la tʋ'ʋdim ka li zabidi m sʋʋnr si'em.
51 Nɛ'ɛsʋg la zug ka fʋ dataas la la'ad, Zugsɔba;
onɛ ka fʋ gaŋ la nɔbir yakir wʋsa ba la'ad o nɛ.
52 Zun'or anɛ Zugsɔb la din saŋa wʋsa!
Ami! Ami!