Winsɔsʋg linɛ bɔɔd sʋŋir tɔɔg pʋʋgin
88
1 O Zugsɔba, Wina'am kanɛ faandimnintaŋ nɛ yʋ'ʋŋ la, fʋn ka m kaasi tis.
2 Kɛl ka m winsɔsʋg paae fʋ san'an na;
fɛndigimi fʋ tʋbiri kɛlisi m kaasig.
3 M sʋʋnr pɛ'ɛli nɛ sʋnsa'aŋ
ka m nyɔvʋr vurisidi li'en yaʋg.
4 Ba kaalimi paas banɛ an kpi'imnam la ni;
m nwɛnɛ ninkanɛ ka o paŋ wʋsa naae.
5 Ba gaŋim nɛ paas banɛ kpi la ni,
m nwɛnɛ banɛ ka ba kʋʋ ba ka ba digi ba yaadin la;
banɛ ka fʋ pʋ lɛn tɛnri ba yɛla la,
ka pʋ lɛm paasi ba banɛ ka fʋ guri ba la nii.
6 Fʋ kɛya ka m bɛ yaʋg teŋir,
zin'ikanɛ zulim ka lik bɛ la.
7 Fʋ sumpɛɛn la anɛ ziidi tɛbigi m zugin,
ka nyaŋim nwɛnɛ atɛuk ku'onwiis.
8 Fʋ kɛya ka m zuanam zɔ ka basim,
ka zan'as ye ba kʋ li'eli ma.
Ba yɔɔm nɛ ka m kʋ nyaŋi yii;
9 m sʋnsa'aŋ la kɛ nɛ ka m nini sɔbid.
O Zugsɔba, m buonnɛ fʋn daar wʋsa;
M ʋki m nu'us agɔla tisif nɛ winsɔsʋg.
10 Fʋ nɔkidi fʋ nyalima la pa'an kpi'imnamaa?
Banɛ kpi la na duoe zun'e fɔɔ?
11 Ba pian'adi fʋ nɔŋilim la yɛla yaʋgʋnɛɛ,
bɛɛ fʋ sida la yɛla san'auŋ zin'igaa?
12 Banɛ bɛ likin la mi' fʋ nyalima la yɛlaa?
Bɛɛ fʋ pʋpielim tʋʋma la bɛ kpi'im teŋaa?
13 Amaa man kaasidi buonnɛ fʋ ye fʋ sʋŋim, O Zugsɔba;
m winsɔsʋg paadi fʋ san'an na bɛkɛung.
14 Zugsɔba, bɔ ka fʋ zan'asim
ka yuki fʋ nindaa ka kɛɛ ma?
15 M biilim saŋa sa m nyɛ namisʋg ka pʋ lal nɛ kum;
fʋ kpɛn'ɛsim dabiem ka m ti'ir lɛn kae.
16 Fʋ sumpɛɛn la limimnɛ wʋʋ ku'om;
dabiem kanɛ ka fʋ kpɛn'ɛsidim la kɛ ka m nyɛ san'auŋ.
17 Daar wʋsa li giligim nɛ wʋʋ ku'om nɛ
ka limim nyain.
18 Fʋ yisi m zuanam nɛ banɛ nɔŋim la m san'an;
lik ma'aa liebi m zua kanɛ bɛ nɛ m yammin.