Yʋʋm kanɛ zun'od Wina'am yʋ'ʋr
92
1 Li an sʋm nɛ tinamɛ na zun'e Zugsɔb la,ka an sʋm nɛ bʋnnwɛ'ɛda na nwɛ'
zun'e fʋn Onɛ Gaad Si'el wʋsa la yʋ'ʋr.
2-3 Ti na nwɛ' duundis nɛ kɔna banɛ kukuma malis,
ka mɔɔli fʋ nɔŋilim la yɛla bɛogʋn
nɛ fʋ sida la yʋ'ʋŋ wʋsa.
4 Fʋ tʋʋm titada la kɛ ka m sʋnf ma'ae, O Zugsɔba;
m yʋ'ʋm nɛ sumalisim yʋʋma fʋn tʋm si'el la yɛla.
5 Fʋ tʋm tʋʋm titada, O Zugsɔba,
ka fʋ pʋtɛn'ɛr la zulim nɛ sɔ' na baŋ!
6 Ya'am ka'alʋg sɔb la zi',
ka zɔn la mɛ pʋ gban'adi li gbin
7 ye bugusnam la na yina nwɛnɛ mɔɔd
ka tʋʋmbɛ'ɛd dim wʋsa ken tuon,
la'am nɛ wala ba na nyɛ san'auŋ linɛ ka' makirɛ.
8 Amaa Zugsɔba, fʋn nyɛtnɛ zun'or saŋa wʋsa.
9 Ya'a an sida fʋ dataas la;
fʋn Zugsɔb dataas la sid na bɔdig;
tʋʋmbɛ'ɛd dim la wʋsa na widig.
10 Fʋ tisim paŋ ka li nwɛnɛ wɛnaaf paŋ nɛ,
ka bu'oe malʋŋ kpaam linɛ an sʋ'ʋŋa la niŋi m zug.
11 M nini nyɛɛm dataas la lu si'em;
ka m tʋba wʋmi m bi'emnam la kaasidi zɔt si'em.
12 Pʋpielim dim la na kpɛn nɔbigid wʋʋ kpʋkparis,
bɛɛ Lebanon na'aziinr banɛ wa'am hali
13 ka ba sɛɛ ba Zugsɔb la yin la;
ba na nɔbigi ti Wina'am la zakin.
14 Ba na ti kʋdig ka nan wan wala,
ka ma'ae siaa, ka ba vaand sɔbig bir-bir.
15 Ba na mɔɔl ye, “Zugsɔb la ka' gba'arɛ.
O anɛ m Tampiing, ka bugusim kae o san'anɛ.”