Sʋŋir winsɔsʋg
86
1 Zugsɔba, wʋm ka lɛbisi tisim,ka m anɛ tadim ka an nɔŋdaan.
2 Guri m nyɔvʋr, ka m pɛsigi m mɛŋi tisif.
Fʋ anɛ m Wina'am, faanmim,
m anɛ fʋ tʋmtʋm ka tisidif sida.
3 Zɔmim nimbaanlig, O Zugsɔba,
ka m buonif daar wʋsa.
4 Tisimim sumalisim,
ka m anɛ fʋ tʋmtʋm,
O Zugsɔba, fʋn ka m nɔki m mɛŋi tis.
5 Zugsɔbaa, fʋ anɛ onɛ an sʋm ka kɛt taali basid,
ka fʋ nɔŋilim la paad banɛ wʋsa sɔsidif.
6 Wʋmmi m sɔsʋg, O Zugsɔba;
kɛlisimi m kaasig ka zɔɔ m nimbaanlig.
7 Yɛla ya'a ti paae m daasi'el, m na buolif,
bɔzugɔ fʋnɛ sʋŋidim.
8 O Zugsɔba, wina la wʋsa sʋʋgin, win lɛn kae nwɛnɛ fʋ;
sɔ' kae ka o tʋʋma na mak nɛ fʋn tʋm si'el la.
9 Tɛɛns banɛ ka fʋ maal la wʋsa nidib
na kena igini fʋ tuon, O Zugsɔba;
ba na kena na'asi fʋ yʋ'ʋr la.
10 Fʋ zu'onɛ galis ka tʋm nyalima;
fʋn ma'aa an Wina'am.
11 Pa'alimim fʋ suor la, O Zugsɔba,
ka m na dɔllif nɛ sida;
da kɛ ka m bi'esidi m pʋtɛn'ɛrinɛ,
ala ka m na zɔti fʋ yʋ'ʋr.
12 M na zun'ʋf nɛ m sʋnf wʋsa, O Zugsɔb Wina'am;
m na na'asi fʋ yʋ'ʋr la saŋa wʋsa.
13 Fʋn nɔŋim si'em la zu'onɛ;
fʋ faanmi yis Ayaʋg linɛ zulim la pʋʋgin.
14 Tita'alim dim la bɔɔd ye ba kʋʋm, O Zugsɔba;
ninkʋʋdib la'asidi bɔɔd ye ba kʋʋm;
nimbanɛ ka ba ba'a ka' nɛf la.
15 Amaa fʋn, Zugsɔba, fʋ anɛ Wina'am onɛ mɔr nimbaanlzɔɔr nɛ nyɔɔg;
fʋ anɛ baanlimm ka fʋ sʋnf pʋ duod tɔ'ɔtɔ,
ka fʋ nɔŋilim nɛ sida ka' naarɛ.
16 Fɛndigim na ka zɔɔm nimbaanlig;
tisim man kanɛ aan fʋ tʋmtʋm la paŋ,
ka faanm, ka m anɛ fʋ tʋmtʋm pu'ak la biig.
17 Kɛl ka m nyɛ zanbin
ka li na pa'al fʋn an sʋm si'em.
Kɛl ka m dataas la nyɛɛ li ka nyan dii ba,
bɔzugɔ, fʋn onɛ aan m Zugsɔb la sʋŋidim ka bɛlisidim.