Winsɔsʋg linɛ bɔɔd ye sʋ'ʋlim la paam yɔlisim
85
1 O Zugsɔba, fʋ da zɔɔ fʋ teŋ la nimbaanlig,ka lɛbis Jakob yaas zusʋŋ la na.
2 Fʋ kɛɛ fʋ nidib la taali bas
ka lusi ba tʋʋmbɛ'ɛd.
3 Fʋ basi fʋ sʋnduor la wʋsa
nɛ fʋ sʋnpɛɛn linɛ mɔr dabiem la.
4 Lɛbisimi tii ti zi'esimin ya'as, O ti Wina'am nɛ ti Faangidaa,
ka da kɛ ka fʋ ya'amlɛog yii ti san'anɛ.
5 Fʋ sʋnf na kpɛn pɛlig nɛ ti saŋa wʋsa?
Bɛɛ fʋ na kɛ ka fʋ sʋnpɛɛn la yuug
ka kpɛn bɛɛ ala nɛ zʋmaana banɛ na ti duoe naa?
6 Fʋ kʋ lɛn tɛndigi ti ya'as
ka fʋ nidib la maal sumalisim fʋ san'anɛɛ?
7 Pa'alimi ti fʋ nɔŋir linɛ pʋ naad la, O Zugsɔbaa,
ka tisi ti fʋ faangir la.
8 M na kɛlis Wina'am onɛ aan ti Zugsɔb la na yɛl si'el;
o kaanb ye o na tis tinam banɛ aan o mɛŋ nidib la sumbʋgʋsʋm,
amaa ti da lɛn lɛbi ti zɔlim tʋʋma la nii.
9 Sida o faangir la pʋ lal nɛ banɛ zɔt o la,
ka o na'am pipilim la na kpɛn bɛ ti teŋin la.
10 Nɔŋir nɛ sida sia'al taaba;
ka pʋpielim nɛ sumbʋgʋsʋm pʋ'ʋs taaba sʋ'ʋŋa.
11 Yɛlsida tansi yit teŋin na,
ka pʋpielim naan arezana ni gɔsid teŋin na.
12 Zugsɔb la sid na tisi ti linɛ an sʋ'ʋŋa,
ka zʋʋd na maali ti teŋin la sʋ'ʋŋa.
13 Pʋpielim gaad o tuon
ka maan suori tisid o nɔba yakir.