Ninkanɛ sʋʋnri lɔ ye o bɛ Zugsɔb Pʋ'ʋsim yin la
84
1 O Zugsɔb Paŋtita'ar Sɔba,fʋ bɛllim zin'ig la sid vɛnl hali!
2 Zugsɔb zakin la ya'amlɛogʋ kʋʋdim;
m sʋnf nɛ m niŋgbina kaasidnɛ
bɔɔd Wina'am Kanɛ Vʋe la.
3 Hali lʋya paam gbɛɛnsa,
ka lilaalis mɛ mɛɛ ba mɛŋ dɔɔd,
zin'ikanɛ ka ba na wiakidi ba biis;
ka li kpi'e nɛ fʋ bimbim la,
O Zugsɔb onɛ an Paŋtita'ar Sɔba,
fʋ anɛ m Na'ab nɛ m Wina'am.
4 Yɛlsʋm bɛ nɛ banɛ bɛ fʋ yin la;
ba wɔ'ɔgidif saŋa wʋsa.
5 Yɛlsʋm bɛ nɛ banɛ paŋi yiti fʋ san'an la,
banɛ gban'e nɛ ba sʋʋnr ye ba keŋ Zion Zuorin la.
6 Ban dɔl Baka bɔn'ɔkpi'eŋ la gaad la,
li lieb zin'ikanɛ ka ku'om tansidi yit na;
ka sigsaa mɛ kɛ ka li lieb bɛɛnna.
7 Ba na maligim paam paŋi paas,
hali nɛ ba wʋsa na ti paae Wina'am san'an Zion Zuorin.
8 Wʋmmi m sɔsʋg, Zugsɔb Wina'am Onɛ an Paŋ Sɔbaa;
kɛlisim tisim, Jakob Wina'am.
9 O Wina'am, fʋnɛ aan ti zaba gbanti'edʋg
kɛl ka fʋ nimbaanlzɔɔr bɛ nɛ onɛ ka fʋ gaŋ
ka bu'oe malʋŋ kpaam niŋ o la.
10 M ya'a bɛɛ fʋ zakin la daar yinne li malisi
gat man na bɛ zin'isi'a dabisa tusir;
M siak man na an Wina'am yir za'anɔgur
gaad man na bɛ bugusim dim yin.
11 Zugsɔb Wina'am la aan m winnig nɛ m zaba gbanti'edʋg;
Zugsɔb la bɔɔdi m yɛla ka na'asidim;
o pʋ mɔŋid banɛ pʋ mɔr taal la bʋnsʋŋɔ.
12 O Zugsɔb Onɛ an Paŋ Sɔbaa,
Yɛlsʋm bɛ nɛ onɛ ti'iri bɛɛ fʋ ni la.