Bi'emnam nyaŋir winsɔsʋg
83
1 O Wina'am, da sinna;da fɔn ki' nɛ, O Wina'am, da zi'e baanlimm nɛ.
2 Gɔsimi fʋ dataas la sʋnya duoe
ka ba ʋki ba zut si'em.
3 Ba gban'e nɛ ye ba tʋmi fʋ nidib la bɛ'ɛd;
ba gban'e ye ba tʋmi fʋ nimbanɛ ka fʋ nɔŋ la bɛ'ɛd.
4 Ba yɛt ye, “Kemi na ka ti san'ami ba teŋ la,
ka sɔ' kʋ lɛn tiɛn Israel yɛla ya'asɛ.”
5 Ba gban'e nɛ pʋtɛn'ɛr yinne;
ba la'as nɛ nɔɔr yinne ye ba zab nɛf.
6 Banɛ an: Edom nɛ Isimael dim nɛ Moab nɛ Haga dim,
7 Gebal nɛ Ammon nɛ Amalek nidib nɛ
Filistia nɛ Taya dim la wʋsa.
8 Hali Asiria dim la'as nɛ ba
sʋŋid Lot yaas nwa ye ba mɔr paŋ hali.
9 Niŋimi ba wʋʋ fʋn da niŋ Midian dim si'em la,
ka lɛn niŋ wʋʋ fʋn da niŋ Sisera nɛ Jabin si'em la,
saŋkan ka fʋ da zabi nyaŋi ba Kison kɔldaugin la;
10 fʋ da nyaŋi ba Endo teŋin
ka ba kpii digi nwɛnɛ sa'ad.
11 Niŋimi ba tuongatib wʋʋ fʋn da niŋ Oreb nɛ Zeeb si'em la,
ka kɛ ka ba na'anam wʋsa nwɛnɛ Zeba nɛ Zalmunna,
12 banɛ da yɛl ye, “Kɛlli ka ti faaɛn teŋ la
ka sʋ'ʋg Wina'am paalʋ la wʋsa.”
13 O m Wina'am, maalimi ba wʋʋ vuoŋ gungum nɛ,
ka nwɛnɛ udug ka sisi'em da'adi li.
14-15 Alazugɔ kadimi ba nɛ fʋ sumpɛɛn la
ka kɛ ka fʋ sisi'etita'ar la kpɛn'ɛsi ba dabiem,
wʋʋ bugum na la'aŋ sian'anr
bɛɛ la'aŋ zuoya dit linɛ bɛ wʋsa si'em la.
16 O Zugsɔba, kɛl ka nyan kpɛn' ba
ka ala ka nidib na ieedi fʋ zin'ig.
17 Kɛl ka ba nyan la bɛ saŋa wʋsa ka li paki ba;
kɛl ka ba kpi nɛ nyan.
18 Kɛl ka ba baŋ ye fʋn kanɛ yʋ'ʋri buon Zugsɔb la,
fʋn ma'aa an Wina'am Onɛ Gaad Si'el wʋsa
ka fʋ sʋ'oe teŋgbauŋ la wʋsa.