Malʋŋ pʋ'ʋsim yʋʋm
81
1 Yʋ'ʋm nɛ sumalisim tisi ti Wina'am onɛ aan ti paŋ la;tansim agɔla gɔla tis Jakob Wina'am la.
2 Pin'ilim yʋʋma la, nwɛ'ɛm siya'ar,
nwɛ'ɛm bʋnnwɛ'ɛda banɛ malis wʋsa.
3 Piebim na'atan nwadpaalig daar,
nɛ nwadigi na ti pɛlig ti malʋŋ di'ema la daar;
4 nɛ'ɛŋa an zi'elʋgʋ tis Israel dim,
nɛ dɔlisʋg linɛ an Jakob Wina'am la din.
5 On da yii zab nɛ Egipt teŋ nidib la
o da zi'eli li nɛ, ka li an wada tis Josef yaas la.
Ti wʋm kʋkɔri pian'ad
ka ti wʋm ka pʋ gban'e li gbinnɛ,
6 ka o yɛl ye, “M tʋk ziid la ba zutin;
ka ba nu'us nyɛ yɔlisim nɛ pɛog kanɛ ka ba zanl la.
7 Ya mugusʋg saŋa la, ya da buolim ka m faaɛn ya.
M da naam satansʋg saŋgbana ni wʋm tisi ya;
ka maki ya Meriba ku'omin la.
8 M yɛl ye, ‘M nidibaa, wʋmmi, ka m na sa'ali ya;
yanam Israel dima, ya ya'a kɛlisidinim,
9 ya naan kʋ mɔrin teŋ zʋŋ bada ya sʋʋgin,
bɛɛ igini zun'e win saaŋa.
10 Manɛ aan ya Zugsɔb Wina'am
onɛ mɔri ya yi Egipt teŋin na la.
Ya'amini ya nɔɔr ka m diisi ya.’
11 Amaa m nidib la pʋ bɔɔd ye ba kɛlisi ma;
Israel dim pʋ siakidi m nɔɔrɛ.
12 Ala ka m kɛ ka ba ken nɛ ba zukpi'euŋ suoya
ka tʋmmi ba mɛŋi gban'e si'em la.
13 Amaa m nidib la ya'a kɛlisinim,
Israel dim mɛ ya'a dɔllini m suoya,
14 m naan fɛndigin nɛ m paŋi zab nɛ ba bi'emnam la
ka nyaŋi ba dataas la tɔ'ɔtɔ!
15 Banɛ kis Zugsɔb la naan igin o tuon nɛ dabiem,
ka ba namisʋg la kʋ mɔr bɛnnɛ.
16 Amaa m na diisi ya nɛ disʋma;
m na kɛ ka ya di tampiing siindi tig.”