Israel dimi sɔs Wina'am ye o mɔri ba lɛb o san'an na si'em
80
1 Fʋn kanɛ an Israel kɔnbkemma, wʋm tisi ti,fʋn kanɛ gur Josef yaas wʋʋ kɔnbid la;
fʋn kanɛ zin' na'am gbauŋ zug Kerubnam teŋsʋk la,
niem paalʋ
2 Efiram nɛ Benjamin
nɛ Manase dɔɔd dim tuon na.
Duom nɛ fʋ paŋ la;
kem na faaɛn ti.
3 Lɛbisimi ti, ti zin'igin, O Wina'am;
kɛl ka fʋ nindaa nie ti san'an,
ka ti nyɛ faangir.
4 Zugsɔb Wina'am Onɛ an Paŋ Sɔba,
fʋ sʋnpɛɛn la ye li yuugi paae wala bɛnnɛ?
Fʋ kʋ lɛn gandigi fʋ nidib winsɔsʋgɔɔ?
5 Fʋ kɛya ka ba diib an sʋnsa'aŋ,
ka nɔk ninta'am pɛ'ɛl laa ye ba nu.
6 Fʋ kɛ ka tinam nɛ ti kpi'es mɔr zaba,
ka ti bi'emnam la'adi ti.
7 Lɛbisimi ti, ti zin'igin, O Wina'am Onɛ an Paŋ Sɔba;
kɛl ka fʋ nindaa nie ti san'an,
ka ti nyɛ faangir.
8 Fʋ da mɔri fʋ nidibi yi Egipt na
ka li nwɛnɛ daam tiig ka fʋ vuoɛn na
ka kad buudbanɛ bɛɛ ani la ka sɛɛ li.
9 Fʋ uus paalʋ tisi li,
ka li tɔn nya'a nɔbigi yadig teŋin la.
10 Ka li ma'asim lus zuoya la wʋsa,
ka lus na'aziinr tititada nɛ ba wila wʋsa.
11 Li tɔɔn li wila paae Atɛukʋn la,
ka li nya'a tɔɔn paae Efiritis kɔldaugin.
12 Bɔ ka fʋ nwa'ae li zaŋguoma bas
ka onɛ gat wʋsa na nyaŋi pi'isi li wala la?
13 Mɔɔgin dɛɛs la nɔɔdi li
ka mɔɔgin bʋnkɔnbid dit ani.
14 Lɛmmi ti san'an na, O Wina'am Onɛ an Paŋ Sɔba;
naanim arezana ni gɔs teŋin na ka nyɛɛ ti!
Gur tikaŋa sʋ'ʋŋa,
15 ka fʋnɛ da nɔki fʋ datiuŋ nu'ugʋ sɛɛ li,
bikanɛ ka fʋ ugusi tisi fʋ mɛŋ la.
16 Ba nwaae fʋ tiig la, ka bugum dii li;
fʋ tansi fʋ nidib la ka ba yʋ'ʋr san'am.
17 Nɔkimi fʋ nu'ugʋ kuak dau kanɛ bɛɛ fʋ datiuŋ la,
ninsaal kanɛ ka fʋ ugus ye o aan fʋ din la.
18 Ka ala ka ti kʋ lɛn fɛndigi tɔɔmi fʋ san'anɛ;
vʋ'ʋgimi ti, ka ti na buoli fʋ yʋ'ʋr.
19 Lɛbisimi ti, ti zin'igin, O Zugsɔb Wina'am Onɛ an Paŋ Sɔba;
kɛl ka fʋ nindaa nie ti san'an,
ka ti nyɛ faangir.