Israel dimi sɔs Wina'am bɔɔd sʋŋir si'em
79
1 Wina'am, ba san'ami fʋ teŋ kanɛ aan fʋ faar la;ba san'ami fʋ Pʋ'ʋsim Yir linɛ aan fʋ din ka an kasi la,
ba kɛ ka Jerusalem lieb tandia'ana.
2 Fʋ tʋmtʋmnib banɛ ka ba kʋ la,
ba nɔki ba tis zuund ka li liebi ba diib,
ka zaŋi ba niŋgbina tis bʋnyuos banɛ bɛ teŋgbauŋʋn la.
3 Ba kpa'ae ziim wʋʋ ku'om nɛ
gilig Jerusalem wʋsa,
ka sɔ' kae na mum kumm.
4 Ti liebnɛ bʋntʋ'ʋda tisi ti kpi'es,
ka banɛ giligi ti la la'adi ti ka gɔs ka ti an yalimnam.
5 O Zugsɔba, fʋ sʋnpɛɛn la bɔɔd ye li yuugi paae wala bɛnnɛ?
Fʋ sʋnf na pɛligid ala saŋa wʋsaa?
Fʋ nyuur linɛ kɛ ka fʋ sʋʋnr la'aŋid wʋʋ bugum la
na yuugi paae wala bɛnnɛ?
6 Kpa'ami fʋ sʋnpɛɛn la
niŋ tɛɛns banɛ ka ba ba'a ka' nɛf la
nɛ sʋ'ʋlim banɛ pʋ buonnɛ fʋ yʋ'ʋr la,
7 nɛ banɛ kʋʋ fʋ nimbanɛ an Jakob yaas
ka san'ami ba teŋ la.
8 Da kɛ ka ti yaanam tʋʋmbɛ'ɛd dɔlli tii;
kɛl ka fʋ nimbaanlzɔɔr paae ti san'an tɔ'ɔtɔ na,
ka ti pʋ lɛm mɔr ti'irɛ.
9 Sʋŋimi ti, O ti Wina'am onɛ an ti Faangidaa,
fʋ yʋ'ʋri an yʋ'ʋsʋŋ la zug;
faanmi ti ka kɛɛ ti taali bas
fʋ girima la zug.
10 Bɔ ka tɛɛns la nidib yɛt ye,
“Ba Wina'am la bɛ yaanɛ?”
Pa'alim tɛɛns la nidibi ti nini ni,
ye fʋ na yɔ sam ban kʋʋ fʋ tʋmtʋmnib la zug.
11 Kɛl ka banɛ bɛ sanrega ni la ʋʋnsʋg paae fʋ san'an na.
Fʋn mɔr paŋ la zugɔ,
gɔsim banɛ ka ba kʋʋs ye ba kpi la
ka gu' ba nyɔvʋya.
12 Ti kpi'es banɛ tʋ'ʋdif la,
yɔɔmi li sam nɔɔr ayɔpɔi, O Zugsɔbaa.
13 Ti anɛ fʋ nidib,
ka nwɛnɛ kɔnbbanɛ ka fʋ kem nɛ;
ti na zun'odif saŋa wʋsa.
Lin yi zʋmaaŋ yinne ti paae yinne ni,
ti na tiɛndi wɔ'ɔgidif saŋa wʋsa.