Zugsɔb la da sʋŋ o nidib si'em
78
1 M nidibaa, wʋmminɛ m pa'alʋg,ka kɛlisi m nɔɔr pian'ad.
2 M na ya'ae m nɔɔri siilim siilima,
ka pian' yɛlsu'ada, linɛ da bɛ kʋdimin la.
3 Li anɛ tinamɛ zamis ka baŋ si'el,
nɛ ti yaanamɛ daa pʋn yɛli ti si'el la.
4 Ti kʋ su'a li ti biisɛ;
ti na yɛl zʋmaaŋ kanɛ duod na la
Zugsɔb paŋ nɛ o nyalima tʋʋma
linɛ nar zun'or nɛ wɔ'ɔgir la yɛla.
5 O zi'el zi'ela tis Jakob yaas
ka zi'el wada Israel teŋin,
linɛ ka o da tisi ti yaanam nɔɔr
ye ba pa'ali ba biis la.
6 Ala ka zʋmaana banɛ dɔlli ba nya'aŋ la na baŋ,
hali ka bibanɛ ka ba nam pʋ du'a la,
mɛ na ti yɛli ba biisi li yɛla.
7 Ala ka ba na tis Wina'am sida
ka kʋ tam on tʋm si'el la
amaa ka na dɔl o zi'ela la sʋ'ʋŋa.
8 Ba kʋ nwɛnɛ ba yaanam
zʋmaaŋ kanɛ zuti kpi'em ka ba pʋ siakid o nɔɔr la
banɛ sʋnya ka' nyain tis Wina'am,
ka ba pʋ dɔl o nɛ sida la.
9 La'am nɛ Efiram dimi bɔb nɛ tiraad la,
tanp nwɛ'ɛb saŋa la ba zɔnɛ.
10 Ba da pʋ dɔl Wina'am nɔnaar la
ka zan'as ka pʋ dɔl o wada la.
11 Ba da tam on maal si'el la,
nɛ nyalima banɛ ka o pa'ali ba la.
12 O tʋm nyalima ba yaanam san'an
Egipt teŋin, Zoan sʋ'ʋlimin.
13 O da pʋdig atɛuk la ka mɔri ba gaad;
ka kɛ ka ku'om la zi'e kiŋ-kiŋ wʋʋ zaŋguom nɛ.
14 O da kɛ ka saŋgbauŋ dɔlli ba nintaŋ
ka bugum mɛ dɔlli ba yʋ'ʋŋ.
15 O da buak tampiins sian'arin la
tisi ba ku'om ka li zu'oe nwɛnɛ atɛuk ku'om nɛ;
16 o da kɛ ka ku'om yi tampiins sian'asim na
pʋbidi nwɛnɛ kɔldaug nɛ.
17 Amaa ba da nan kpɛn tʋm tʋʋmbɛ'ɛdi pɔ'ɔgid o,
ka zan'as Zugsɔb Onɛ Gaad Si'el wʋsa la sian'arin la.
18 Ba da gban'e ba pʋtɛn'ɛrin ye ba mak Wina'am
ka fabil ye ba bɔɔd diib.
19 Ba da pian' pɔ'ɔg Wina'am yɛt ye,
“Wina'am sid na nyaŋi tisi ti diib sian'arin nwaa?
20 O daa nwɛ' tampiing ka ku'om tans na
pʋbid yɔri-yɔri,
amaa o na nyaŋi tisi ti diibɔɔ?
O na nyaŋi tis tinam banɛ aan o nidib la ni'imɛɛ?”
21 Zugsɔb la da wʋm la, o sʋnf da pɛlig ya hali,
ka o kɛ ka bugum la'aŋ Jakob yaas la,
ka o sʋnf duoe nɛ Israel dim,
22 ban pʋ niŋ Wina'am yadda,
bɛɛ tis sida ye o na faaɛn ba la zug.
23 La'am nɛ wala, o tis saŋgbana banɛ bɛɛ agɔla la nɔɔr
ka yɔ'ɔg agɔla za'anɔya;
24 o kɛ ka manna li na ka nidib la di,
o tisi ba arezana ni zʋʋd.
25 Ka ninsaalib la di maliaknam diib;
o da tisi ba diib linɛ na sia'ali ba wʋsa.
26 O kɛ ka nya'aŋ sisi'em yi saŋgbana ni na
ka kɛ ka o paŋ zi dagɔbʋg sisi'em na.
27 O da kɛ ka ni'im lina wʋʋ titan nɛ,
ka niis ian'adi nwɛnɛ atɛuk nɔɔrin titanbin'isi.
28 O da kɛ ka ba ian'a kpɛn' o nidib la'asʋg zin'igin na,
giligi ba sʋga la.
29 Ka nidib la ɔnbi tig hali sʋ'ʋŋaa,
bɔzugɔ o da tisi ba, ba ya'amlɛog bɔɔdim.
30 Amaa ban da nam pʋ dii ba ya'amlɛog diib la naae la,
hali ka li nam bɛɛ ba nɔya ni la,
31 ka Zugsɔb sʋnf duoe nɛ ba;
ka o kʋʋ ba ninkpi'ema banɛ bɛɛ ba sʋʋgin la,
banɛ an Israel na'akimsʋma la.
32 La'am nɛ wala wʋsa, ba da nan kpɛn tʋm tʋʋmbɛ'ɛd;
hali nɛ o tʋʋmnyalima la wʋsa, ba da nam pʋ niŋ o yadda.
33 Ala ka o da kɛ ka ba vʋm ba'as yɔri
ka kɛ ka dabiem mɔri ba, ba bɛllim pʋʋgin.
34 Wina'am ya'a da ɛɛnti kɛ ka ba kpiid;
ba fɛndig nɛ lɛb o san'an ya'as nɛ nimmua.
35 Ba da yii tiɛn ye Wina'am aan ba Tampiing,
Wina'am Onɛ Gaad Si'el wʋsa la aan ba Faangid.
36 Amaa li da pʋ yuugida ka ba lɛm pian'ad o nɔŋgban malisim ma'aa,
ka mɔri ba zilima la faad o;
37 ba sʋnya ni ba da pʋ dɔl o nɛ sidaa,
o nɔnaar la ba da pʋ dɔlli li sʋ'ʋŋaa.
38 La'am nɛ wala o da anɛ nimbaanlzɔt;
o kɛɛ ba taali bas
ka pʋ san'ami ba.
Saŋa bɛdegʋ o gu'usid o sʋnpɛɛn
ka pʋ kɛ ka o sʋnf pɛligi galisɛ.
39 O da tiɛnya ye ba anɛ niŋgbiŋ ma'aa,
ba nwɛnɛ pɛbisim na da'ae gaad ka kʋ lɛb si'em na la.
40 Gɔsim saŋa bɛdegʋ ka ba da zan'as o nɔɔr sian'arin la
ka san'am o sʋʋnr si'em!
41 Ba makid Wina'am saŋa wʋsa;
ba san'amid Israel Wina'am Onɛ an Kasi la sʋʋnr.
42 Ba da pʋ lɛn tɛnri o paŋ kanɛ ka o da zaŋi faaɛn ba
banɛ da mugusidi ba la nu'usin la yɛla,
43 daakanɛ ka o da pa'al o nyalima zanbina Egipt teŋin,
nɛ o kilima tʋʋma Zoan sʋ'ʋlimin la.
44 O da tiak Egipt dim kɔldaad ka li kilim ziim;
ka ba pʋ nyaŋidi nuudi ba kɔldabʋmbu'ad la ku'om.
45 O da kɛ ka dumis yina dumi ba,
ka kɛ ka lɔmis san'ami ba teŋ la.
46 O da kɛ ka sisɔma san'ami ba pɔɔd,
ka na'azɔmnam san'ami ba zʋʋd.
47 O san'ami ba vain tiis nɛ waad
ka kɔɔ ba kekama nɛ sakuga.
48 O da kɛ ka sakuga kʋʋ ba niigi,
ka kɛ ka satansʋg kʋʋ ba kɔnbid.
49 O da kpa'ae o sʋnpɛɛn linɛ la'aŋidi nwɛnɛ bugum la
nɛ o sʋnsa'aŋ tita'ar la niŋi ba zug
ka kɛ ka o maliaknam banɛ kʋʋd la da yina.
50 O da tis o sumpɛɛn la suor;
o pʋ kɛ ka ba pɔns nɛ kum
amaa ka kɛ ka ban'abɛ'ɛd gban'e ba.
51 O da kʋ Egipt dim bikpɛma wʋsa;
yir wʋsa biribiŋ kpɛɛmnam banɛ da bɛ Ham sʋga ni la da kpiya.
52 Amaa o da mɔr o nidibi yina wʋʋ kɔnbid nɛ;
o da dɔlisi ba yi sian'arin wʋʋ pɛ'ɛs nɛ.
53 O da guri ba sʋ'ʋŋa ka dabiem pʋ mɔri ba;
amaa ka atɛuk la vɔli ba dataas.
54 O da mɔri ba paae teŋ kanɛ an kasi la titɔndigin na,
ta'asi ba paae zuoya teŋin na
zin'ikanɛ ka o nɔk o paŋi faaɛn tisi ba la.
55 O da kad buudbanɛ bɛɛ ba tuon la
ka pʋdig teŋ la tisi ba ka li aan ba faar;
ka zin'il Israel buudi la ka ba zin' ba yaan.
56 Amaa ba da lɛm mak Wina'am
ka zan'as Wina'am Onɛ Gaad Si'el wʋsa la;
ba pʋ di'e o nɔɔr zi'elʋgɔ.
57 Ba da anɛ wʋʋ ba yaanamɛ da an si'em la ka ka' sida dima ka pʋ mɔr yaddaa,
ka nwɛnɛ tiraug kanɛ mɔr dɛŋ nɛ.
58 Ba da duoe o sʋʋnr nɛ ban maan maana zin'isieba la;
ka kɛ ka fufum mɔr o nɛ ba bada la zug.
59 Wina'am da nyɛɛ li la ka o sʋʋnr pɛlig hali;
ka o zan'as Israel dim la nyain.
60 O da bas o pʋ'ʋsim dɔɔg linɛ bɛ Siilo la,
nɛ Fuug Sʋgʋr linɛ ka o ti' li nidib sʋʋgin la.
61 O da kɛ ka ba dataas faaɛn Nɔnaar Daka linɛ aan o paŋ,
nɛ linɛ an zanbinnɛ pa'annɛ o na'am pipilim la.
62 O sʋnf da pɛlig nɛ o nimbanɛ aan o faar la galis;
ka o kɛ ka ba dataas zabi kʋʋ ba.
63 Bugum da kanbi ba na'akim la wʋsa,
ka ba pu'asada pʋ nyɛ sidibi kulɛ;
64 Ba da kʋʋ ba maanmaannib la tanpin
ka ba pʋkɔnya gʋ'ʋŋ kukuma.
65 Ani ka Zugsɔb la duoe wʋʋ ninkanɛ nie gbɛɛmin nɛ,
bɛɛ ninkanɛ bug daam ka li yɛɛg o an si'em la.
66 O da kad o dataas la lɛbis nya'aŋ;
ka diisi ba nyan linɛ pʋ mɔr bɛnnɛ.
67 Amaa o da zan'as Josef yaas la,
o da pʋ gaŋ Efiram dɔɔg la;
68 amaa ka lɛɛ gaŋ Juda dɔɔg la,
nɛ Zion Zuokanɛ ka o nɔŋ la.
69 O da mɛɛ o Pʋ'ʋsim Yir anina ka li nwɛnɛ agɔl nɛ,
ka lɛn nwɛnɛ teŋgbauŋ kan ka o maal ka li bɛ saŋa wʋsa la.
70 O da gaŋ David onɛ aan o tʋmtʋm la
yis o kɔnbkemmin;
71 zin'ikanɛ ka o da kem kɔnbid la mɔr o na
ye o kem o nimbanɛ an Jakob yaas la;
Israel dim banɛ aan o faar la.
72 Ka David da guri ba nɛ pʋʋg yinne;
o da mɔri ba nɛ mi'ilim.