Wina'am sʋŋid nidibi ba yɛlmugusa saŋa
77
1 M kaasi tis Wina'am ye o sʋŋim,m kaasi tis Wina'am ye o wʋmi m sɔsʋg.
2 Man daa bɛ sʋnsa'aŋin la, m daa sɔs Zugsɔb la;
yʋ'ʋŋ ya'a sɔb m ʋkidi m nu'us hali ka pʋ gɛɛnda
ka m sʋʋnr wʋsa pʋ lɛn siakid bɛlisigɔ.
3 M tɛn'ɛsi fʋ yɛla, O Wina'am, ka unsid;
m fabilnɛ hali ka m paŋ ti naae.
4 Fʋ kɛya ka m nini wak;
M sʋʋnr san'am nɛ galis ka m gʋ'ʋŋ pian'ad.
5 M tɛn'ɛs dabisbanɛ gaad la,
nɛ yʋʋm banɛ gaad sa la yɛla;
6 Ka m tɛn'ɛsi m yʋ'ʋŋ yʋʋma la yɛla.
Ka m sʋʋnr san'am, ka m yɛli m mɛŋ ye,
7 “Zugsɔb la na kpɛn zan'asidi tii?
O sʋnf kʋ lɛm malis nɛ ti ya'asɛɛ?
8 O nɔŋilim linɛ pʋ naad la bɔdignɛ la nyainnɛɛ?
O kaanbʋg la pʋ nyaŋidi tʋm saŋa wʋsaa?
9 Wina'am tam o nimbaanlzɔɔr la yɛla nɛɛ?
O sʋnpɛɛn la yɛla ka o pʋ lɛn zɔti ti nimbaanligaa?”
10 Ka m tɛn'ɛs ye, “Nɛ'ɛŋa zugɔ m na sɔs o:
yʋma banɛ ka ti da nyɛt Onɛ Gaad Si'el wʋsa paŋ la lɛn kae.”
11 M na tiɛn Zugsɔb la tʋʋma;
sida, m na tɛn'ɛs tʋʋm banɛ ka fʋ da tʋm ka li yuug la.
12 M na tɛn'ɛs fʋn tʋm si'em la wʋsa
ka tiɛn fʋ tʋʋm titada la.
13 O Wina'am, fʋ suoya la anɛ kasi.
Win kan bɛ yaanɛ zem nɛ ti Wina'am la?
14 Fʋ anɛ Wina'am kanɛ tʋm nyalima;
fʋ pa'al nidib la fʋ paŋi an si'em.
15 Fʋ da faaɛn fʋ nidib la nɛ fʋ paŋ tita'ar,
banɛ an Jakob nɛ Josef yaas la.
16 M Wina'am, ku'om la da nyɛɛf la,
ku'om la sid da nyɛɛf la ka dabiem kpɛn' o;
ka li ku'ozuluŋ zin'ig la kirid.
17 Saŋgbana la da pin'ili niid saa,
ka maligim mɔr satansʋg;
ka fʋ piema la ken tuon nɛ nya'aŋ.
18 Satansʋg la da naam sisi'epiliŋin la tansid,
ka sa-ian'asʋg kɛ ka dunia nie nyain;
ka teŋ la dam ka kirid.
19 Fʋ suobuga da dɔlli atɛukʋn la,
ka fʋ suoya dɔl ku'otitada la ni,
la'am nɛ fʋ nɔbtan'am pʋ nyɛt la.
20 Fʋ da mɔri fʋ nidib la ken wʋʋ kɔnbid
ka Moses nɛ Aaron guri ba.