Wina'am an sariakat
75
1 Ti pʋ'ʋsif bareka, O Wina'am,ti pʋ'ʋs ya bɔzugɔ, fʋ yʋ'ʋr la bɛ nɛ ti yammin;
nidib yɛti fʋ tʋʋmnyalima la yɛla.
2 Fʋ yɛl ye, “M gaŋnɛ saŋa kanɛ ka m zi'el la,
li anɛ manɛ kat saria ka li dɔl suor.
3 Teŋgbauŋ la ya'a ti dam nɛ nimbanɛ bɛɛ li pʋʋgin la,
manɛ gban'adi lii mɔr kiŋ-kiŋ.
4 Tita'alnam la ka m yɛt ye, ‘Da dʋ'ʋsi ya mɛŋ ya'asɛ’,
ka yɛl bugusnam la ye, ‘Da lɛm pa'ali nɛ ya paŋ la!
5 Da dʋ'ʋsidi ya mɛŋ agɔllɛ;
da pian'adi ka duoe ya niŋgɔnya dɔi nɛ.’ ”
6 Sɔ' kae ya-nya'aŋ, bɛɛ ya-tuona,
bɛɛ yi pipirisin na, na nyaŋi dʋ'ʋs ninsaala.
7 Amaa li anɛ Wina'am:
onɛ sied nid, onɛ lɛn dʋ'ʋsid nid.
8 Bʋtiŋ bɛ Zugsɔb la nu'ugin
li pɛ'ɛl nɛ daam kanɛ gɛndig bʋnnyubisa
o na kpa'ae li bas,
ka bugusnam banɛ bɛ teŋin la na nuu li wʋsa naae.
9 Ya'a kpɛlim nɛ mam, m na yɛl nɛ'ɛŋa saŋa wʋsa;
m na yʋ'ʋm zun'e Jakob Wina'am la.
10 M na san'am bugusnam la paŋ,
amaa pʋpielim dim la,
m na kɛ ka ba dʋ'ʋsi ba.