Winsɔsʋg linɛ bɔɔd ye Wina'am faaɛn ba teŋ dataas nu'usin
74
1 Wina'am, bɔ ka fʋ zan'asi ti nyainnɛ?Bɔ ka fʋ sʋnf pɛlig nɛ fʋ nimbanɛ nwɛnɛ fʋ pɛ'ɛs la?
2 Tɛnri fʋ nimbanɛ ka fʋ gaŋ ka li yʋma zulim la,
buudkanɛ aan fʋ faar ka fʋ faaɛn ba la.
Tɛnr Zion Zuokanɛ aan fʋ bɛllim zin'ig la.
3 Fɛndigimi fʋ nindaa kpa' gɔsi
fʋ Pʋ'ʋsim Yir la san'am si'em,
dataas la san'ami li ka li pʋ lɛm mɔr maalʋgɔ.
4 Fʋ dataas bɛ zin'ikanɛ ka tinam nɛ fʋ la'asid la
ka nwa'ami tansid nyaŋir tansʋg;
ba sɛɛ ba tuutanamɛ zi'el
ka li an zanbinnɛ pa'an ye ba nyaŋ ya.
5 Ba niŋidi nwɛnɛ nimbanɛ zanl zɛnna ba nu'usin
ye ba nwa tiis bɛdegʋ lug.
6 Ka zaŋ liemis nɛ zɛnna
san'am dabanɛ ka ba kpi'a la.
7 Ba nyu'oe fʋ pʋ'ʋsim Dɔɔg la ka li dii paae teŋin;
ba kɛ ka fʋ yʋ'ʋri bɛ zin'isi'a la lieb dian'ad.
8 Ka yɛli ba pʋtɛn'ɛrin ye, “Ti na san'ami ba wʋsa nyain!”
Teŋin la wʋsa ba nɔk bugum nyu'oe
ka li di zin'ibanɛ wʋsa ka ba daa pʋ'ʋsid Wina'am la.
9 Ti pʋ lɛn nyɛt zanbina ka li an nyalimaa;
nɔdi'esidib la baa yinne pʋ kpɛlim,
ka ti sɔ' mɛ zi' nɛ'ɛŋa na yuugi paae si'em bɛnnɛ.
10 O Wina'am, bʋndaar ka fʋ dataas la na basi fʋ la'abɔ?
Bi'emnam la na kpɛn san'amidi fʋ yʋ'ʋr ala saŋa wʋsaa?
11 Bɔɔ kɛ ka fʋ fuoe fʋ nu'ugʋ ti san'anɛ? Hali fʋ datiuŋ nu'ug la ka basi ti?
Yisimi fʋ nu'ug la fʋ fuugin na san'ami ba!
12 O Wina'am, fʋnɛ da aan m na'ab pin'ilʋgʋn sa;
fʋnɛ mɔr faangiri kɛn teŋgbauŋ la zug na.
13 Li anɛ fʋnɛ da buak atɛuk la nɛ fʋ paŋ;
fʋnɛ da nwa'ae ku'omin bʋnyua la zut.
14 Li anɛ fʋnɛ da mɛdig bʋmbɛ'og kanɛ ka ba buon Lɛviatana la zug
ka nɔk o niŋgbina tis pipirisin bʋnkɔnbid ka li liebi ba diib.
15 Li anɛ fʋnɛ da yɔ'ɔg ku'osuoya
nɛ zin'ibanɛ ka ku'om tansidi yit na la;
ka mɛ kɛ ka kɔldaad banɛ pʋbid saŋa wʋsa la kʋdig.
16 Fʋnɛ sʋ'oe nintaŋ ka lɛn sʋ'oe yʋ'ʋŋ;
fʋnɛ da maal winnig nɛ nwadig.
17 Fʋnɛ da mak teŋgbauŋ la wʋsa titɔndis;
fʋnɛ maal ʋʋn nɛ sɛɛung wʋsa.
18 O Zugsɔbaa, tɛn'ɛsim dataas la la'adif si'em,
gɔsim nimbanɛ an zɔn la san'amidi fʋ yʋ'ʋr si'em.
19 Ti nwɛnɛ fʋ dawana nɛ,
da nɔki ti tis sian'arin bʋnkɔnbidɛ,
da tami fʋ nimbanɛ namisid la yɛla nyainnɛ.
20 Tɛnri fʋ nɔnaar la yɛla,
bɔzugɔ teŋ la zin'ibanɛ an lik la wʋsa pɛ'ɛl nɛ zaba.
21 Da kɛ ka banɛ ka ba mugusidi ba la lɛb nɛ nyannɛ;
kɛl ka nɔŋ dim nɛ fara dim la dʋ'ʋsi fʋ yʋ'ʋr.
22 O Wina'am, duom zabi sʋŋi fʋ nidib la;
tɛn'ɛsim zɔn la san'amidi fʋ yʋ'ʋr la saŋa wʋsa si'em.
23 Da tam fʋ bi'emnam la sʋnya duoe si'em la,
bɛɛ fʋ dataas la maan tʋkpiidʋg saŋa wʋsa si'em laa.