GBAUŊ KANƐ PAAS ATAN'
Yʋʋma 73-89
Wina'am tʋmnɛ linɛ nar
73
1 Sida, Zugsɔb la an sʋm tis Israel,nɛ banɛ pʋʋgʋ an nyain la.
2 Amaa li ya'a anɛ mam, li kpɛlimin bi'ela ka m sadigin;
li kpɛlimin fiin ka m ti'ir wʋsa gaadin.
3 Bɔzugɔ, m daa mɔr fufum nɛ nyɛɛsim dim la,
man daa nyɛ ka bugusim dim ken tuon la zug.
4 Si'el-si'el pʋ daamidi baa;
ka ba niŋgbina mɔr laafi nɛ paŋ.
5 Namisʋg linɛ paad nidib la pʋ paad banɛ;
ban'as mɛ pʋ gban'adi ba wʋʋ sieba bɛn'ɛd si'em la.
6 Dinzugɔ, nyɛɛsim aan ba niŋgɔnkɔris
ka ba nɔk zaba yɛ wʋʋ fuug nɛ.
7 Ba sʋnya an bɛ'ɛd la zug ka ba tʋm tʋʋmbɛ'ɛd;
bɛ'ɛd linɛ ka ba tɛn'ɛsidi ba pʋtɛn'ɛrin la pʋ mɔr bɛnnɛ.
8 Ba pʋ nan nidiba, ka pian'ad nɛ kisidim
ba nyɛɛsim la zug ka ba bɔɔd ye ba namisi ba taaba.
9 Ba pian'adi nwɛnɛ banɛ sʋ'oe arezana,
ka pa'an nyɛɛsim dunia nwa pʋʋgin.
10 Alazugɔ, ba nidib yʋ'ʋn fɛndigi lɛbidi ba san'an
ka siakid ban yɛt si'el wʋsa wʋʋ ku'om ka ba nuud nɛ.
11 Ba yɛt ye, “Wina'am na niŋ wala baŋɛ?
Onɛ Gaad Si'el wʋsa la mɔr baŋirɛɛ?”
12 Bugusim dimi an si'em la,
ba ba'a kae, ba mɔɔdi ban na nyɛ kpan'am paas.
13 Sida, man pɛligi m pʋʋgʋ bɛ si'em la anɛ zaalim;
ka san'ami m ya'a gban'e m mɛŋ nɛ tʋʋmbɛ'ɛd.
14 Dabisa la wʋsa m bɛ nɛ namisʋgʋn;
bɛkɛung wʋsa m nyɛti namisʋg.
15 M ya'a yɛlin ye m na pian' li yɛla
m naan yiinɛ fʋ biis la nya'aŋ.
16 Mam daa mak ye m gban'e li gbin la,
li daa anɛ linɛ mugusidim pamm,
17 hali ti paae saŋkanɛ ka m kpɛn' Wina'am pʋ'ʋsim Yin la;
ani ka m baŋi ba naarɛ na an si'em.
18 Sida, fʋ nɔki ba niŋ sisalig zin'igin;
fʋ da'ae ba bas teŋin ye ba san'am.
19 Gɔsim ban gbirigi san'am si'em!
Dabiem mɔri ba gaad sa nyain!
20 Li nwɛnɛ nidi na zaansim ka duoe gbɛɛmin,
Oo Zugsɔba, fʋ ya'a ti duoe,
fʋ na nɛ'ɛsi ba ban ka' gbin la zug.
21 M sʋnfʋ daa san'am saŋa si'a
ka ɛndʋg mɔrim hali la,
22 m daa anɛ zɔlʋg ka zi' si'el si'ela
ka nwɛnɛ bʋnkɔnbʋgʋ fʋ tuon.
23 La'am nɛ wala, m bɛ fʋ san'an saŋa wʋsa
ka fʋ gban'e m datiuŋ nu'ug.
24 Fʋ gurim nɛ fʋ sa'alʋg
ka li naar wʋsa fʋ na mɔrimi keŋ na'asi zin'igin.
25 M mɔr anɔ'ɔn arezana ni, ka li ya'a ka'anɛ fʋn ma'aanɛ?
Si'el kae teŋgbauŋ la zug ka m bɔɔdi lɛm paas fʋn zugɔ.
26 M niŋgbina nɛ m sʋnf tun'e tadig,
amaa Wina'am an onɛ kpɛmisidi m sʋnf;
on ma'aa ka m bɔɔd saŋa wʋsa.
27 Banɛ basif la na bɔdig;
fʋ na san'am banɛ wʋsa pʋ dɔllif nɛ sida la.
28 Amaa li ya'a kpɛlim nɛ mam,
li an sʋm nɛ man pʋ lal nɛ Wina'am la.
M na kɛ ka Zugsɔb la aan m suak zin'ig,
ka lɛm mɔɔn o tʋʋm sʋma yɛla saŋa wʋsa.