Ban sɔs Wina'am tis na'ab la yɛla
72
1 Pa'alim Na'ab la fʋ yɛlsida, O Wina'am,pa'alim na'abiig la fʋ pʋpielim.
2 O na kadi fʋ nidib la saria nɛ pʋpielim,
nɛ fʋ nimbanɛ namisid la nɛ yɛlsida.
3 Kɛl ka zuoya la mɔr bɛllim linɛ an sʋm na tis nidib la,
ka kʋkʋna mɔr pʋpielim na.
4 O na zab o nimbanɛ namisid la yɛla
ka tis biis banɛ an fara dim la yɔlisim;
o na san'am onɛ namisidi ba la paŋ.
5 O na bɛ saŋa wʋsa nwɛnɛ winnig
nɛ nwadigi bɛ si'em la,
hali nɛ zʋmaana wʋsa.
6 O na nwɛnɛ saa niid mɔma'asa zug,
ka nwɛnɛ samilimmiugʋ niidi bʋgʋn teŋ la.
7 O bɛllim saŋa la pʋpielim na bɛ;
si'el wʋsa na an sʋ'ʋŋa paae nwadig la bɛn.
8 O na sʋ'oe atɛuk nɔɔrin keŋ paae atɛuk nɔɔrin
nɛ Efiritis kɔldaug la nɔɔrin paae teŋ la bɛn.
9 Buudbanɛ bɛ pipirisin la na igin o tuon
ka o dataas lii o tuon tintannin.
10 Tarsis na'ab nɛ banɛ bɛ lalli la
na mɔr piini na tis o;
Seeba teŋ nɛ Seba teŋ na'anam mɛ
na yɔɔd lampɔɔ tisid o.
11 Na'anam wʋsa na igin o tuon
ka sʋ'ʋlim wʋsa na tʋmmi tisid o.
12 Bɔzugɔ onɛ na faaɛn fara dim banɛ kaasidi buon o la,
nɛ banɛ namisid ka pʋ mɔr sʋŋid la.
13 O na zɔ tadimnam nɛ nɔŋ dim la nimbaanlig
ka faaɛn ba kum pʋʋgin.
14 O na faaɛn ba zaba nɛ mugusʋg pʋʋgin,
ba vʋm yɛla pak o la zug.
15 O na vʋe yuug!
Ba na tis o sanlima linɛ yit Seeba teŋin na.
Nidib na sɔsid Wina'am tisid o
ka kaanb sʋm tis o saŋa wʋsa.
16 Kɛl ka zʋʋd bɛ teŋ la wʋsa ni;
hali nɛ kʋkʋna la wʋsa zug.
Ka wal wala wʋʋ Lebanon zʋʋdi maan si'em la;
ka bul nwɛnɛ mɔɔd banɛ bɛ mɔɔgin la bʋn si'em la.
17 Kɛl ka na'ab la yʋ'ʋr bɛ saŋa wʋsa;
kɛl ka o yʋ'ʋr na yuug wʋʋ winnigi yuugid si'em la.
On zug ka sʋ'ʋlim bɛdegʋ na nyɛ bareka,
ka ba na buon o ye Wina'am bareka sɔb.
18 Zun'or anɛ Zugsɔb onɛ an Israel Wina'am la din,
on ma'aa tʋm nyalima.
19 Zun'omin o yʋ'ʋr linɛ an sʋm hali la saŋa linɛ ka' bɛnnɛ;
teŋgbauŋ la wʋsa pɛ'ɛl nɛ o na'am pipilim.
Ami! Ami!
20 Jese biig David winsɔsʋg la bɛnnɛ nwa.