Wina'am onɛ an Paŋtita'ar Sɔba la aan m ti'ir
71
1 O Zugsɔba, fʋ san'an ka m su'adi m mɛŋ;da kɛ ka m di nyannɛ.
2 Faanmim ka yisim nɛ fʋ pʋpielim la;
Wʋmmi m sɔsʋg ka faanm.
3 Aan m tampinkanɛ ka m su'adi fʋ ni,
ani ka m na ken saŋa wʋsa;
tisim nɔɔr ka m nyɛ faangir,
bɔzugɔ fʋnɛ aan m tampiing nɛ m kpi'euŋ zin'ig.
4 M Wina'am, faanmim nimbɛ'ɛdnam la nu'usin,
banɛ an bugusnam ka tʋm bɛ'ɛd la.
5 Bɔzugɔ fʋnɛ an m ti'ir, O Paŋtita'ar Sɔba,
lin yii m biilimin sa hali ti paae nannanna.
6 Lin yii m du'am saŋa sa fʋn ma'aa ka m ti'e;
fʋnɛ yisimi m ma pʋʋgin na.
Fʋn ma'aa ka m na zun'od.
7 M bɛllim la anɛ zanbinnɛ tis nidib bɛdegʋ,
bɔzugɔ fʋnɛ aan m kpi'euŋ nɛ m suak zin'ig.
8 Fʋ zun'or ma'aa bɛɛ m nɔɔrin,
m pa'annɛ fʋ pipilim la an si'em daar wʋsa.
9 M ya'a kʋdig, fʋn da kadimi basɛ;
m paŋ ya'a ti naae, fʋn da tami m yɛllɛ.
10 M dataas pian'adi m yɛla bɛ'ɛd
banɛ mɔɔd ye ba kʋʋm la la'asi gban'e, yɛt ye,
11 “Wina'am tam o yɛla,
kʋdim gban'aminɛ o,
ka sɔ' kʋ faaɛn o.”
12 Wina'am, da lal nɛ ma;
lɛm tɔ'ɔtɔ na sʋŋim, O m Wina'am.
13 Banɛ duoe zi'e m yɛla la na bɔdig ka di nyan;
banɛ bɔɔd ye san'auŋ paam la na di nyan.
14 Amaa ya'a kpɛlim nɛ mam, m na mɔr ti'ir saŋa wʋsa;
m na dʋ'ʋsif ka maligim dʋ'ʋsif.
15 M nɔɔr na yɛli fʋ pʋpielim
nɛ fʋ faangir la yɛla daar wʋsa,
la'am nɛ mam kʋ nyaŋi maki baŋ lin zem si'em la.
16 M na kena mɔɔli fʋ tʋʋm kpi'ema la yɛla,
O Zugsɔb Paŋtita'ar Sɔba;
m na mɔɔl pʋpielim
linɛ an fʋn ma'aa din la yɛla.
17 O Wina'am, m biilim saŋa ka fʋ pa'alim,
hali ti paae zina ka m kpɛn mɔɔnnɛ
fʋ nyalima tʋʋma la yɛla.
18 Hali m ya'a kʋdig ka m zug pɛlig,
fʋn da tami m yɛllɛ, O Wina'am,
hali ti paae man na mɔɔli fʋ paŋ la yɛla tis zʋmaaŋ kanɛ kenna la,
ka lɛm mɔɔli fʋ kpi'euŋ la yɛla tis banɛ na ti kena la.
19 O Wina'am, fʋ pʋpielim la paae saŋgbana ni,
fʋn kanɛ tʋm tʋʋm bɛda la,
O Wina'am, anɔ'ɔn nwɛnɛ fɔ?
20 La'am nɛ fʋn kɛ ka m nyɛ yɛla bɛdegʋ nɛ tɔɔg la,
fʋ na lɛbisi m paŋ la na;
hali m ya'a sigi bɛ teŋ teŋir
fʋ na mɔrimi dʋ'ʋs na ya'as.
21 Fʋ paasim na'asi
ka bʋgʋli m sʋʋnr ya'as.
22 M Wina'am, fʋ sida la zug,
m na nwɛ' kɔnne zun'ʋf.
M na yʋ'ʋm dʋ'ʋsi fʋ yʋ'ʋr,
O Israel Wina'am onɛ an Kasi.
23 Mam kanɛ ka fʋ faaɛn la,
na baamid nɛ sumalisim
zun'odi fʋ yʋ'ʋr.
24 M zilim na yɛli fʋ pʋpielim tʋʋma la yɛla daar wʋsa,
banɛ bɔɔd ye ba san'amim la,
ba ya'am fɛndig ya ka ba di nyan.