Winsɔsʋg kanɛ kaasidi bɔɔd faangir
69
1 Faanmim, O Wina'am,ka ku'om la paae m kʋkɔya.
2 M simnɛ bian'ar la pʋʋgin sa,
zin'ikanɛ ka nɔbir zi'elʋg zin'ig kae.
M paanɛ ku'ozuluŋin la,
ka ku'om la nyaŋim.
3 M gɛnɛ ka bɔɔd sʋŋir;
m kʋdig nɛ.
M nini sɔbid nɛ,
ka m ieedi m Wina'am.
4 Banɛ kis man ka li ka' gbin la
gaad mam mɛŋ zuobid kal;
dataas banɛ yaam zaalim-zaalim la zu'oya,
ba anɛ banɛ mɔɔd ye ba san'amim.
Li anɛ mugusʋgʋ tisim ban yɛtim ye
m yɔɔm linɛ ka m pʋ zu la.
5 O Wina'am, fʋ mi' m zɔlim yɛla,
m tʋʋmbɛ'ɛd pʋ su'a fʋ san'anɛ.
6 Da kɛ ka banɛ mɔr ti'iri fʋ san'an la
di nyan man zugɔ,
O Zugsɔb onɛ an Paŋtita'ar Sɔba;
da kɛ ka banɛ ieedif la
di nyan man yɛlaa,
O Israel Wina'am.
7 Fʋn yɛla ka ba tʋ'ʋdim saŋa wʋsa,
ka diisidim nyan daar woo.
8 Man liebnɛ saanne m ba'abiisin,
ka nwɛnɛ teŋ zʋŋ nidi m mɛŋ mabiis la ni;
9 M nini mu'oe nɛ Wina'am Yir yɛla si'em la
li nwɛnɛ bugum dit man nɛ
nimbanɛ tʋ'ʋdif la tʋ'ʋdnɛ mam.
10 M ya'a lɔ nɔɔri sɔsid Wina'am nɛ kukuma,
ba la'adim nɛ;
11 M ya'a yɛ bɔto fuug sʋnsa'aŋ zugɔ,
ba mɔrim nɛ siilim.
12 Banɛ zin' za'anɔɔrin la la'adim nɛ,
ka danuudib mɔrimi yʋ'ʋm yʋʋma.
13 Amaa m Zugsɔba, fʋn ka man sɔsid.
Wina'am, gandigimim fʋ sʋŋir saŋa
nɛ fʋ nɔŋilim tita'ar la,
di'emi m sɔsʋg nɛ fʋ yɛlsida faangir la.
14 Yisimim bian'arin la,
da kɛ ka m firi li nii;
faanmim banɛ kisim la nu'usin.
Yisimim ku'ozulima la ni.
15 Da kɛ ka ku'om linɛ pʋbid la nyaŋim,
bɛɛ linɛ zulim la limi ma,
bɛɛ yaʋg linɛ an bʋmbɔk la vɔli ma.
16 Di'emi m sɔsʋg, O Zugsɔba, fʋ nɔŋilim linɛ an sʋm la zug;
fʋ nimbaanlzɔɔr la zugɔ, fɛndigimi m san'an na.
17 M anɛ fʋ tʋmtʋm, da su'a fʋ nindaa nɛ ma;
di'emi m sɔsʋg tɔ'ɔtɔ, ka m bɛ nɛ yɛla ni.
18 Li'elim na faanm;
faanmim yisi m bi'emnam la nu'usin.
19 Fʋ mi' ban tʋ'ʋdim ka nɛ'ɛsidim ka kpɛn'ɛsidim nyan si'em;
m bi'emnam la wʋsa bɛ nɛ fʋ tuon ka fʋ nyɛti ba.
20 Tʋ'ʋd la san'ami m sʋʋnr pamm
ka kɛ ka m kʋ lɛn nyaŋi maal si'ela;
M ieed onɛ na bʋgʋli m sʋnf, ka sɔ' kae;
ka bɔɔd onɛ na zɔtim nimbaanligi gʋ'ʋŋ.
21 Ba daa nɔk yabidi niŋi m diibin
ka nɔk bʋmmi'isʋgʋ gɛndigi m bʋnnuuda ni.
22 Kɛl ka dikanɛ ka ba dit la lieb bɛndigʋ tisi ba;
ka ba nɔnaar nɛ taaba la lieb baŋi gban'e ba.
23 Kɛl ka ba nini zu'om ka ba kʋ nyɛta,
ka kɛ ka ba tadigi ku'usid teŋin saŋa wʋsa.
24 Kpa'ami fʋ sumpɛɛn la yɛɛli ba;
ka kɛ ka fʋ sumpɛɛn linɛ dit wʋʋ bugum la kanbi ba.
25 Kɛl ka ba yir na yɔ danzuunr,
ka nidib kʋ lɛm bɛɛ aninaa.
26 Ba namisidi banɛ ka fʋ pu'alimi ba la
ka pian'ad banɛ ka fʋ kɛ ka tɔɔg paae ba la yɛla bɛ'ɛd.
27 Sɔmmi ba tʋʋmbɛ'ɛd la wʋsa digil;
da kɛ ka ba nyɛ fʋ faangir laa.
28 Yisimi ba yʋda nyɔvʋr gbauŋʋn la
ka da kɛ ka ba yʋda la'as nɛ pʋpielim dim la.
29 M sʋʋnri san'am ka m niŋgbina zabid;
O Wina'am, kɛl ka fʋ faangir paŋ la gurim.
30 M na yʋ'ʋm zun'e Wina'am yʋ'ʋr
ka na'as o nɛ bareka pʋ'ʋsim.
31 Nɛ'ɛŋa na ma'ae Zugsɔb la sʋʋnri gaad naaf maan,
o bɔɔdi li gaad na'araug kanɛ mɔr iila nɛ tafɛɛd.
32 Nɔŋ dim na nyɛ ka ba sʋnya ma'ae;
yanam banɛ ieed Wina'am la sʋnya sid na malis!
33 Zugsɔb la wʋm fara dim la kaasig,
ka pʋ nɛ'ɛsid o nimbanɛ bɛ mugusʋg pʋʋgin la yɛla.
34 Kɛl ka agɔl nɛ teŋgbauŋ zun'e o,
la'am nɛ atɛuk nɛ linɛ bɛ li pʋʋgin wʋsa.
35 Wina'am na faaɛn Zion
ka lɛbis Juda tempʋʋs la mɛ'.
Ka nidib na zin'in ani ka sʋ'ʋgi li;
36 o tʋmtʋmnib la biis na dii li faar,
ka banɛ nɔŋ o yʋ'ʋr la na bɛɛ ani.