Nyaŋir yʋʋm
68
1 Wina'am, duom zi'en ka fʋ dataas la widig;fʋ bi'emnam la na zɔɔ widigi fʋ tuon.
2 Nwɛnɛ sisi'em da'ad nyɔ'ɔsi ken si'em la
fʋ na da'ae ba ka ba gaad;
nwɛnɛ bugum nyɛligid singbana si'em la,
ala ka ba na bɔdig Wina'am tuon.
3 Amaa pʋpielim dim la na mɔr sumalisim
ka maal sumalisim Wina'am tuon;
ba sʋnya sid na malis hali.
4 Yʋ'ʋm tis Wina'am, yʋ'ʋm zun'or yʋʋma tis o,
dʋ'ʋsim Onɛ Ban'ad Saŋgbana la yʋ'ʋr;
o yʋ'ʋri buon Zugsɔb,
maalimi sumalisim o tuon!
5 O anɛ kpiibis ba', ka an onɛ sʋŋid pʋkɔnya,
onɛ an Wina'am kanɛ bɛɛ o Zin'ig Kanɛ An Kasi la ni.
6 Wina'am tisid banɛ pʋ mɔr si'el-si'el la ya' ka ba kpɛn'ɛd,
onɛ yisid banɛ bɛ sanrega ni la ka ba yʋ'ʋm nɛ sumalisim;
amaa banɛ zan'as o la na bɛ teŋ kanɛ mɔr nintantʋʋlʋg
7 O Wina'am, fʋn da gaad nidib la tuonnɛ
mɔri ba dɔl sian'arin la,
8 teŋ la da dam ya,
ka saa naan agɔlli ni
Sinai Zuor zug fʋn Wina'am,
onɛ sid an Israel dim Wina'am la tuon.
9 Wina'am, fʋ tis saa bɛdegʋ
ye fʋ bʋgʋli fʋ teŋ kanɛ kʋdig la.
10 Ani ka fʋ nidib la da kena zin'in,
ka fʋ kɛ ka zʋʋd maal bɛdegʋ, O Wina'am,
ka tis banɛ an nɔŋ dim la ban bɔɔd si'el wʋsa.
11 Zugsɔb la da tis o labaar la,
ka pu'ab pamm giligi mɔɔli li yɛla yɛt ye,
12 “Na'anam nɛ ba soogianam zɔt tɔ'ɔtɔ
ka basi ba la'asʋg la zin'ig,
ka nidib pʋdig la'abanɛ ka ba faaɛn la.
13 Hali yanam banɛ da gbɛɛnd bʋnkɔnbid dɔɔdin la,
ya nyɛt la'ad linɛ nwɛnɛ dawana kɔnbid nɛ
ka ba buligi li nɛ anzurifa,
ka li kɔnbid nyɛɛnnɛ nwɛnɛ sanlim nɛ.”
14 Paŋtita'ar Sɔb la da widig na'anam teŋin saŋsi'a la,
li da nwɛnɛ sakuga lit Zalmon Zuor zug nɛ.
15 Basan zuoya la anɛ zuotitada;
Basan zuoya la dʋnɛ hali.
16 Yanam zuotitada, bɔ ka ya gɔsid
zuokanɛ ka Zugsɔb la gaŋ ye o sʋ'oe
ka na bɛɛ ani saŋa wʋsa la nɛ fufumɛ?
17 Wina'am zaba tɛrekonam la zu'onɛ,
ba anɛ tusa-tusa ka pʋ mɔr kallɛ;
Zugsɔb la yi Sinai kɛɛn o pʋ'ʋsim yin la na.
18 Fʋn da dʋʋ agɔla la,
fʋ da mɔri banɛ an yammis bɛdegʋ keŋ,
ka di'e piini nidib san'an,
hali la'am nɛ banɛ zan'asif la:
Zugsɔb Wina'am, fʋ na bɛɛ ani.
19 Dʋ'ʋsim Zugsɔb la yʋ'ʋr,
Wina'am onɛ aan ti Faangid,
ka ziidi ti zitɛbisa tisidi ti daar wʋsa la.
20 Ti Wina'am la anɛ faangid Wina'am,
Zugsɔb Paŋtita'ar Sɔb la yisidi ti kumin.
21 Sida, Wina'am na nwa'ae o dataas la zut,
o na nwa'ae banɛ ken nɛ tʋʋmbɛ'ɛd ma'aa la zut.
22 Zugsɔb la yɛl ye, “M na mɔri ba yi Basan teŋin na,
nɛ atɛuk zulʋŋ la pʋʋgin,
23 ka ya na piesi ya nɔba ya bi'emnam la ziimin,
hali ka ya baas mɛ na nyɛɛ ba din.”
24 O Wina'am, sɔ' mɛkama nyɛ fʋn ken si'em,
Wina'am onɛ an Na'ab la ken si'em
kpɛn'ɛd o pʋ'ʋsim yin la.
25 Banɛ yʋ'ʋm la bɛ tuon ka bʋnnwɛ'ɛda la bɛɛ ba nya'aŋ,
ka pu'asada la bɛɛ ba teŋsʋkʋ nwɛ'ɛd siyaaris.
26 Zun'om Zugsɔb la nidib la'asʋg zin'igin;
zun'om Zugsɔb la Israel dim wʋsa bɛ si'el la.
27 Benjamin dɔɔg kanɛ an fiin la gaadi ba tuon,
ani ka Juda na'ayikpɛm la bɛ,
nɛ Zebulun nɛ Naftali kpi'emnam wʋsa.
28 Wina'am, kɛl ka fʋ paŋ la nie paalʋ,
pa'alimi li tisi ti wʋʋ fʋn ɛɛnti niŋid si'em la.
29 Fʋ pʋ'ʋsim Yiri bɛ Jerusalem la zug
na'anam na mɔr piini na tisif.
30 Kadim Egipt dim banɛ nwɛnɛ bʋnkɔnbidi bɛ mɔɔgin la,
ka tans tɛɛns la nimbanɛ an wʋʋ wɛniigi la.
Widigim tɛɛns banɛ bɔɔd zaba la,
ka kɛ ka ba sie ba mɛŋ ka mɔr anzurifa na tisif.
31 Ba na tʋm nidib ka ba yi Egipt teŋin kena,
Kus dim mɛ na nɔki ba mɛŋi tis Wina'am.
32 Dunia na'anama, yʋ'ʋm tisi Wina'am,
yʋ'ʋm zun'oni ti Zugsɔb la.
33 Yʋ'ʋm tisi on, Onɛ Ban'ad Saŋgbana la,
saŋgbana banɛ da pʋn dɛŋi bɛ agɔla kʋdimin sa
tansid nɛ kʋkɔtita'ar la.
34 Mɔɔlim Wina'am paŋ la yɛla
onɛ ka o kpi'euŋ gur Israel,
ka o paŋ bɛ saŋgbana ni la.
35 O Wina'am, fʋn bɛ fʋ Pʋ'ʋsim Yin si'em la,
fʋ tʋʋmnyalima kpɛn'ɛsid nidib dabiem.
Israel Wina'am la tisid o nidib kpi'euŋ nɛ paŋ.
Na'asi anɛ Wina'am din!