Yʋʋm kanɛ zun'od ka pʋ'ʋsid Wina'am bareka
66
1 Teŋgbauŋ wʋsa, tansim nɛ sumalisim tis Wina'am!2 Yʋ'ʋmmi yʋʋma yɛl o yʋ'ʋr la mɔr vɛnlim si'em;
kɛl ka o zun'or la dʋʋ agɔla!
3 Yɛlim Wina'am ye, “Fʋ tʋʋma la mɔr nyalima!
Fʋ paŋ la zu'oya
ka fʋ dataas la kiridi kennɛ fʋ tuon na.
4 Dunia la wʋsa iginidi fʋ tuon;
ba yʋ'ʋmnɛ zun'odif,
ba yʋ'ʋmnɛ zun'odi fʋ yʋ'ʋr.”
5 Kemi na gɔsi Wina'am la tʋm si'el,
o tʋm tʋʋmnyalima tis o nidib.
6 O kɛ ka atɛuk lieb teŋ kpi'emis,
ka ba dɔl teŋ kpi'emis la gaadi dʋ.
Alazugɔ, kemi na ka ti maal sumalisim o san'an!
7 O paŋ la zug ka o na'am la ka' naarɛ,
ka o nini gɔsid tɛɛns la wʋsa
ka sɔ' kʋ nyaŋi zan'asi o nɔɔrɛ.
8 Zun'omi ti Wina'am la, yanam nidiba,
kɛlli ka ba wʋm yanamɛ zun'od o la;
9 o guri ti nyɔvʋya
ka kʋ maligin kɛ ka ti sadigɛ.
10 O Wina'am, fʋ maki ti gɔs;
ka siligi ti wʋʋ anzurifa ka ba nyɛlig nɛ.
11 Fʋ kpɛn'ɛsi ti sanrega ni
ka ziili ti ziid.
12 Fʋ bas suor ka nidib nɔɔdi ti;
ka kɛ ka ti dɔl bugum nɛ ku'om pʋʋginɛ gaad;
amaa fʋ mɔri ti kɛn zin'ikanɛ ka diib bɛ bɛdegʋ na.
13 M na mɔr nyu'or maana kɛɛn fʋ pʋ'ʋsim yin la na,
ka maal mam pɔ nɔɔri zi'el ye m na maal si'el la wʋsa.
14 Man da bɛ yɛla ni ka pɔ nɔɔri zi'el la,
m na maal wʋʋ man da yɛl si'em la.
15 M na nɔk bʋnkɔnbid banɛ nɔbi tisif
ka maal maan nɛ pɛraad;
M na nɔk na'araad nɛ bʋʋsi maal maan.
16 Yanam banɛ zɔt Wina'am la wʋsa, kemi na kɛlisi;
kɛl ka m mɔɔli on tʋm si'em tisim la wʋsa.
17 Man kaas nɛ tis o;
ka yʋ'ʋm yʋʋma zun'e o yʋ'ʋr.
18 M sʋnf ya'a nɔŋin tʋʋmbɛ'ɛd,
Zugsɔb la naan kʋ kɛlisini m pian'adɛ;
19 amaa Wina'am sid kɛlisya
ka wʋmi m winsɔsʋg.
20 Wina'am yʋ'ʋr na paam zun'or,
on pʋ zan'asi m winsɔsʋg
bɛɛ mɔŋim o nɔŋilim la!