Zun'or nɛ bareka pʋ'ʋsʋg yʋʋm
65
1 O Wina'am li nar ye ti zun'odif Zion teŋin;ti na maal tinamɛ pɔɔ zi'el ye ti maal si'el la tisif.
2 Fʋn kanɛ wʋm winsɔsʋg la,
nidib wʋsa na kɛɛn fʋ san'an na.
3 Tinamɛ daa bɛ tʋʋmbɛ'ɛdin
ka li zu'oe nyaŋi ti la,
fʋ di suguru ka kɛɛ ti taali bas.
4 Banɛ ka fʋ gaŋ la mɔr Wina'am bareka;
ban ka fʋ mɔri ba na ye ba bɛɛ fʋ zakin la!
Ti nyɛ la'asʋma banɛ bɛɛ fʋ yin la,
fʋ pʋ'ʋsim zin'ikanɛ an kasi la.
5 Fʋ di'e ti winsɔsʋg nɛ fʋ pʋpielim
linɛ an tʋʋmnyalima la,
O Wina'am onɛ an ti Faangida.
Fʋnɛ an sɔ' wʋsa ti'ir dunia nwa ni
nɛ banɛ bɛɛ atɛukʋn lallisa la.
6 Fʋnɛ maal zuoya la nɛ fʋ mɛŋ paŋ,
ka li pa'annɛ fʋ kpi'euŋ linɛ galis la,
7 ka kɛ ka atɛuk la ma'ae baanlimm,
ka li ku'onwiis mɛ ma'ae baanlimm,
ka kɛ ka tʋkpiidʋg linɛ yit tɛɛnsin la na lɛbi fɔn.
8 Banɛ bɛ teŋ-magbinnin la sa zɔti fʋ tʋʋmnyalima la;
winnigi yit si'el hali ti paae on lut si'el la,
fʋ kɛya ka nidib nyɛt sumalisim.
9 Fʋ gɔsid teŋ la ka dɔn'ɔsidi li;
ka kɛ ka li mɔr kʋ'ʋlʋm.
Wina'am kɔldaad la pɛ'ɛl nɛ ku'om
ye li kɛ ka nidib nyɛ zʋʋd,
bɔzugɔ fʋnɛ maali li ala.
10 Fʋ kɛya ka saa ni ka ku'om pɛ'ɛl vugus
hali birigi li wʋsa;
fʋ kɛya ka saa nii bʋgʋli li
ka kɛ ka li zʋʋd la mɔr bareka.
11 Yʋʋm la pʋʋgin fʋ kɛya ka nidib bʋn zʋʋd bɛdegʋ,
ka diib pɛ'ɛli ba niigi tɛrekonam hali badigidi lut suoya ni.
12 Mɔma'asa bɛ pipirisin la ka kɔnbid ɔnbid;
ka kʋkʋna la mɔr sumalisim.
13 Bʋnkɔnbid galis nɛ zin'ikanɛ ka yaama bɛ la,
ka bɔn'ɔd la mɛ pɛ'ɛl nɛ zʋʋd;
ka ba yʋ'ʋm ka tansid nɛ sumalisim.