Wina'am nidib sɔsid Zugsɔb ye o guri ba
64
1 Wʋmmi m fabʋlʋgʋ tisim, O Wina'am;gu'umi m nyɔvʋr ka bi'em daan la da nyaŋi ma.
2 Su'amim ka bugusnam la gban'abɛ'ɛd la da paae ma,
nɛ tʋʋmbɛ'ɛd dim banɛ zu'oe mɔr tʋkpiidʋg la.
3 Ba saasi ba zilima nɛ wʋʋ sʋ'ʋs nɛ
ka pian'adim pian'abɛ'ɛd wʋʋ piema ka ba ɔɔnni tɔɔndim.
4 Ba bɛ nɛ ba suakin ka tɔɔnd banɛ pʋ maali ba si'ela;
ba ɛɛnti gbirig nɛ tɔɔnd ka dabiem kae.
5 Ba kpɛmisidi taaba gban'ad gban'abɛ'ɛd,
ka pian'ad ban na su'adi bɛnt baans si'em;
ka yɛt ye, “Anɔ'ɔn na nyɛ ti baans nwa?”
6 Ba gban'ad linɛ pʋ dɔl suorɛ ka yɛt ye,
“Ti gban'e gban'asʋŋ!”
Sida ninsaal pʋtɛn'ɛr nɛ o sʋnf mɔri ya'ambɛ'ɛd.
7 Amaa Wina'am na tɔɔn ba nɛ piema;
o na tɔɔn ba vuguri digil teŋin.
8 O na kɛ ka ba mɛŋ pian'ad tuligi dii ba
ka kɛ ka san'auŋ paae ba;
ka banɛ wʋsa nyɛɛ ba na lɔbid zug ka nɛ'ɛsidi ba.
9 Nidib wʋsa na zɔt dabiem;
ba na mɔɔl Wina'am tʋʋma la yɛla
ka tɛn'ɛsid on maal si'el la.
10 Kɛl ka pʋpielim dim la mɔr sumalisim
Zugsɔb la ni ka su'a o san'an;
kɛl ka banɛ pʋ mɔr gba'are ba sʋnya ni la zun'e o.