M faangir yit nɛ Zugsɔb san'an na
62
1 Mam anɛ baanlimm ka gu'usid Wina'am la;m faangir yit nɛ o san'an na.
2 On ma'aa aan m tampiing nɛ m faangid;
onɛ aan m suak zin'ig, m kʋ zɔt dabiem.
3 Bɔ ka ya la'asi gilig nid yinnɛ?
Ya wʋsa na la'asi lug o
wʋʋ zaŋguom kanɛ dɛlli bɔɔd liig,
bɛɛ dɔkpin kanɛ pʋ mɔr paŋa?
4 Ba mɔɔd ye ba sigis o zin'isʋŋ kanɛ ka o bɛ la ni;
ba ya'amlɛog anɛ faad ma'aa.
Ba kaanbidnɛ kaanb sʋŋʋ ba nɔya ni,
ka lɛɛ kaanbid kaanbbɛ'ɛdi ba sʋʋnrin.
5 Zugsɔb la ma'aa ka m gu'usid;
m ti'ir yit nɛ o san'an na.
6 On ma'aa aan m tampiing nɛ m faangid;
onɛ aan m suak zin'ig, m kʋ zɔt dabiem.
7 M faangir nɛ m na'asi bɛ nɛ Wina'am nu'usin;
o anɛ m tampintita'ar,
ka aan m suak zin'ig.
8 Nidibaa, tisimin o sida saŋa wʋsa,
pɛligimi ya pʋʋg nyain tis o,
ka Wina'am la aan ti suak zin'ig.
9 Ninsaalib wʋsa nwɛnɛ nidi na vʋ'ʋsi yis na,
kpi'emnam nɛ tadimnam wʋsa pʋ mɔr sidaa;
ba ya'a la'asi ba maki ba tɛbisim
ba anɛ zaalim wʋʋ sɔ' na vʋ'ʋsi yis na.
10 Da nɔk la'abanɛ ka fʋ fan' ka li an sida bʋn
bɛɛ nwɛ'ɛd nyɔ'ɔg nɛ na'ayiigim la'adɛ,
hali baa fʋ arezak ya'a bɔɔd lin paasim si'em,
amaa da kɛ ka fʋ ya'am kpɛn' li.
11 Bʋn yinne ka Wina'am pian' li yɛla,
bʋnama ayi' ka m wʋm;
ye fʋn, Wina'am, fʋ anɛ kpi'euŋ sɔb,
12 ka fʋn, O Zugsɔba, fʋ anɛ nɔŋilim sɔb.
Sida fʋ na yɔ sɔ' wʋsa
wʋʋ on tʋm si'em.