Wina'am nidib sɔsid o ye o guri ba
61
1 Wʋmmi m kaasig, O Wina'am;kɛlisimi m winsɔsʋg.
2 Dunia bɛn wʋsa ni ka m buolif,
m buolnɛ hali ka m susʋnya ligid;
mɔrimi keŋ tampiing kanɛ wa'ami gat mam la ni.
3 Fʋnɛ aan m suak zin'ig,
zin'ikanɛ kpi'em ka gu'udi m dataasi lɛbisid.
4 M ya'am bɔɔd ye m bɛɛ fʋ sʋgʋrin la saŋa wʋsa
ka su'a m mɛŋi fʋ kpʋkpama lɛuŋʋn.
5 O Wina'am, fʋn wʋm mam pɔ nɔsi'a zi'el la,
ka tisim faar linɛ ka fʋ digil
ye fʋ tis banɛ zɔti fʋ yʋ'ʋr la.
6 Paasim na'ab la yʋma,
ka o saŋa na zu'oe zʋmaana bɛdegʋ ni.
7 O na zin'in Wina'am na'am gbauŋ zug saŋa linɛ ka' bɛnnɛ;
nɔkimi fʋ nɔŋilim nɛ fʋ sida la gur o.
8 Ala ka m na yʋ'ʋm zun'e fʋ yʋ'ʋr la
ka maal linɛ ka m pɔɔ zi'el la dabisir wʋsa.